भैरवनाथ संघाला कबड्डीचे विजेतेपद

निगडी, ता.२१ ः छत्रपती शिवाजी महाराज जयंतीनिमित्त गणेश मित्र मंडळ आणि तळवडेच्या गणेशनगर येथील शिवजयंती उत्सव समितीच्यावतीने आयोजित मॅटवरील कबड्डी स्पर्धेत भोसरीचा भैरवनाथ कबड्डी संघाने विजेतेपदासह ३३ हजार ३३३ रुपयांचे पारितोषिक पटकाविले.
पुणे जिल्हा कबड्डी असोसिएशनच्या मान्यतेने ही स्पर्धा झाली. या स्पर्धेत पुणे जिल्ह्यामधील निमंत्रित संघ सहभागी झाले. अंतिम लढतीमध्ये भैरवनाथ कबड्डी संघाने युवा बॅनर संघावर ३५- १२ असा विजय मिळविला. उपविजेत्या युवा बॅनर संघाला २२ हजार २२२ रुपयांचे पारितोषिक देण्यात आले. तृतीय क्रमांकाच्या संघाला ११ हजार १११ रुपयांचे पारितोषिक देण्यात आले. याबरोबरच उत्कृष्ट चढाई, उत्कृष्ट पकड आणि उत्कृष्ट अष्टपैलू अशी चषक व रोख रक्कम स्वरूपातील पारितोषिकेही देण्यात आली. गणेश मित्र मंडळाने यंदा ‘डीजे’ मुक्त शिवजयंती साजरी करण्याचा निर्णय घेतला होता. त्या अंतर्गत शिक्षण मंडळाचे माजी सभापती धनंजय भालेकर व मंडळाच्या सहकार्याने ही स्पर्धा भरविण्यात आली.