महापुरुषांच्या विचारांमुळे जातीचा प्रादुर्भाव कमी

जुनी सांगवी, ता. २ ः ‘‘महापुरुषांच्या विचारांमुळेच समाजात जातीचा प्रादुर्भाव कमी झाला. गावपातळीवर जातीवरून कसे हिणवतात हेच चित्र फॅंड्रीमधून जब्याच्या माध्यमातून जनतेसमोर मांडले. जब्या काही अंशी माझ्यात ही आहे. जब्याचे जीवन मीही अनुभवले आहे. मात्र, महापुरुषांच्या विचारांमुळे जात नावाच्या विचित्र रोगाचा प्रादुर्भाव कमी होताना दिसत आहेत,’’ असे प्रतिपादन दिग्दर्शक नागराज मंजुळे यांनी केले.
नवी सांगवी येथील नटसम्राट निळू फुले नाट्यगृहात पिंपरी-चिंचवड कल्चरल फाउंडेशनच्या वतीने मंजुळे यांना कलाविभूषण पुरस्काराने सन्मानित करण्यात आले. रोख रक्कम ५१ हजार, सन्मान चिन्ह असे त्याचे स्वरूप होते.फाउंडेशनचे अध्यक्ष विजय भिसे यांनी मंजुळे यांची प्रकट मुलाखत घेतली. कार्यक्रमास आमदार अश्विनी जगताप, माजी आमदार विलास लांडे, माजी नगरसेवक शत्रुघ्न काटे, नाना काटे, निर्मला कुटे, उद्योजक वसंत काटे, सतीश इंगळे, बापू पवार, उद्योजक संजय भिसे, जगन्नाथ काटे, सुरेश काटे, डॉ. अमरसिंग निकम, लेखिका अनिता भिसे, कुंदा भिसे आदी उपस्थित होते.
आमदार जगताप म्हणाल्या, ‘‘मंजुळे यांनी सैराटमधून पळून गेलेले प्रेम युगुलांमुळे घरातील झालेली घालमेल आणि ऑनर किलिंगचा प्रश्न मांडला. मागासवर्गीय जातीचा म्हणून ग्रामीण भागातून होणारा अपमान थांबला पाहिजे. यावर सर्वांनी आवाज उठवला तर जातीचा ज्वलंत प्रश्न नष्ट होईल.’’
प्रास्ताविकात विजय भिसे म्हणाले, ‘‘शहराचा सर्व क्षेत्रात विकास झालेला आहे.मात्र शहरातील कला संस्कृतीचा अधिक विकास व्हावा या हेतूने सांस्कृतिक उपक्रम राबवत आहोत. सांस्कृतिक अस्मिता जपण्यासाठी पिंपरी-चिंचवड कल्चरल फौंडेशनच्या माध्यमातून प्रयत्न करीत आहोत.’’ संतोष घुले यांनी मंजुळे यांच्या परिचय पत्राचे वाचन केले. सूत्रसंचालन प्राजक्ता जोगळेकर यांनी केले. आभार शिल्पा बिडकर यांनी मानले.

‘‘सर्व महापुरुषांनी सर्व जातिधर्मातील नागरिकांसाठी समाज परिवर्तन करण्याचे कार्य केले. डॉ. बाबासाहेब आंबेडकर, महात्मा फुले यांच्यासह अनेक महापुरुषांनी छत्रपती शिवाजी महाराजांना आपले गुरू मानले. छत्रपती शिवाजी महाराजांमुळे केवळ एका जातीचा उद्‍धार झाला नाही तर अठरापगड जातींसह संपूर्ण महाराष्ट्राचा उद्‍गार झाला. मराठी संस्कृतीचा विकास झाला.
- नागराज मंजुळे, दिग्दर्शक