कवींच्या रचना अन् नृत्याचे सादरीकरण

पिंपरी, ता. ३० ः पिंपरी-चिंचवडमधील संस्कार भारती संस्थेच्यावतीने नृत्यदिनानिमित्त नृत्यतरंग २०२४ या कार्यक्रमाचे आयोजन करण्यात आले होते. प्रतिभा कॉलेज सभागृहात कार्यक्रम झाला. मराठी आणि हिंदी कवितांवर नृत्यरचना करण्यात आली होती.
वेगवेगळ्या कवींच्या रचना नृत्य कलाकारांनी नृत्याच्या माध्यमातून सादर केल्या. पिंपरी-चिंचवडमधील चौदा नृत्य संस्था या कार्यक्रमात सहभागी झाल्या होत्या. मनोरंजन, प्रबोधन, ज्वलंत विषय, ऐतिहासिक घटना रंगविणाऱ्या अशा विविध कवितांवर सादर करण्यात आलेल्या कलाकृतींनी प्रेक्षक भारावून गेले. या कार्यक्रमाला प्रतिभा कॉलेजचे संस्थापक डॉ. दीपक शाह, ज्येष्ठ कथक नर्तक डॉ. नंदकिशोर कपोते, प्रशांत कुलकर्णी, डॉ. राजेंद्र कांकरिया, सुवर्णा बाग, विशाखा कुलकर्णी, प्रफुल्ल भिष्णुरकर, लीना आढाव आदी उपस्थित होते. सुनीता कुलकर्णी यांनी सूत्रसंचालन केले.