वाइल्ड लाइफ फोटोग्राफी आव्हानात्मक

पिंपरी, ता.९ : ‘‘वाइल्ड लाइफ फोटोग्राफीमध्ये कमाविण्यासारखे काहीच नाही; तर ही छायाचित्रे काढताना खूप काही गमवावे लागते. मात्र, जो क्षण येतो तो अचूक टिपणे हे सगळ्यात महत्त्वाचे आणि आव्हानात्मक असते. परंतु, यातील सगळे अनुभव रोमांचक असतात. वाइल्ड लाइफ फोटोग्राफीच्या क्षेत्राकडे वळण्यापूर्वी आपल्याकडे कमाईचा एक स्त्रोत असणे गरजेचे आहे.’’, असे मत आंतरराष्ट्रीय छायाचित्रकार बैजू पाटील यांनी व्यक्त केले.
प्राधिकरणातील ग. दि. माडगूळकर नाट्यगृह येथे देवदत्त फोटोग्राफी स्कूलच्यावतीने आयोजित मुलाखतीत बैजू पाटील यांनी छायाचित्रे काढताना अनुभवलेले थरारक प्रसंग, किस्से कथन केले. छायाचित्रकार देवदत्त कशाळीकर यांनी त्यांची मुलाखत घेतली. यावेळी माजी विभागीय आयुक्त दिलीप बंड, डॉ. संजय सिंग, प्रशांत पाटील यांच्या उपस्थितीत बैजू पाटील यांचा विशेष सत्कार करण्यात आला. पाटील यांनी काढलेल्या पुरस्कारप्राप्त छायाचित्रांचा स्लाइड शो याप्रसंगी दाखविण्यात आला.
पाटील म्हणाले,‘‘ आपण सगळे निसर्गाचं काहीतरी देणं लागतो. वन्यजीव छायाचित्रकार हे निसर्गावर काम करत असतात. निसर्गाचे अस्तित्व टिकून ठेवण्यात त्यांचे मोलाचे योगदान राहिले आहे. व्यावसायिक दृष्टिकोन ठेऊन जर वाइल्ड लाइफ फोटोग्राफी केली; तर निसर्ग तुम्हाला काहीच देणार नाही. मात्र, जर पॅशन म्हणून केली; तर नक्कीच आपण नक्कीच चांगले काम करू शकतो.’’
देशातील रणथंबोर अभयारण्य, जिम कॉर्बेट अभयारण्य, भरतपूर पक्षी अभयारण्य, ताडोबा अशा विविध ठिकाणी काढलेल्या छायाचित्रांविषयी त्यांनी माहिती दिली. यावेळी आलेले अनुभवही त्यांनी कथन केले. त्यासोबत वाइल्ड लाईफ फोटोग्राफीसाठी कोणत्या लेन्सेस असाव्यात ?, किती वेळ द्यावा ?, प्राण्यांसोबत वेळ कसा घालवावा ? याची इत्यंभूत माहिती दिली.