तडे गेलेल्या रस्त्याच्या दुरूस्तीचे काम सुरू नवी सांगवी फाटा ते घोलप कॉर्नर दरम्यान रस्त्याच्या दर्जावर प्रश्‍नचिन्ह सकाळ बातमीचा परिणाम

जुनी सांगवी, ता. १० ः नवी सांगवी फाटा ते घोलप कॉर्नर दरम्यान नुकत्याच झालेल्या सिमेंट रस्त्याला तडे गेल्याने येथील कामाच्या दर्जाबाबत प्रश्नचिन्ह उभे राहिले होते. याबाबत ‘सकाळ’ने वृत्त प्रसिद्ध करताच त्याची दखल घेऊन दुरुस्तीच्या कामाला सुरवात झाली आहे.
गेल्या वर्षभरापासून या रस्त्याचे चार टप्प्यांत सिमेंट कॉंक्रिटीकरणाचे काम करण्यात आले. मुख्य रस्ता असल्याने सांगवी, नवी सांगवी, पिंपळे गुरव परिसरातील नागरिकांना रहदारीसाठी कसरत करावी लागली होती. काम पूर्ण होऊन रस्ता खुला केल्यानंतर एका महिन्यातच रस्त्याला तडे जाणे, पदपथ खचल्याने रस्ता विकासकामे करताना ती वेळेत व दर्जेदार करावीत, अशी नागरिकांची मागणी होती. पाचशे मीटर रस्त्यासाठी सुमारे आठ कोटी २५ लाख रुपये इतका खर्च करण्यात आलेला आहे. यात पावसाळी जलवाहिन्या, सेवा वाहिन्या, पदपथ, रस्ता सिमेंट कॉंक्रिटीकरण अशा गोष्टींचा समावेश होता‌. मार्च २०२४ ही कामाची मुदत होती. सिमेंट कॉंक्रिटीकरण काम पूर्ण झाल्यानंतर पदपथ व इतर किरकोळ कामे सुरू ठेवून, हा रस्ता मार्चनंतर रहदारीसाठी खुला करण्यात आला. मात्र, ठिक ठिकाणी रस्त्याला भेगा पडल्याने पुन्हा दुबार या रस्त्याच्या दुरुस्तीचे काम सुरू करण्यात आले आहे. याबाबत ‘सकाळ’मधून १७ मे रोजी बातमी प्रसिद्ध करण्यात आली होती.

दुरुस्ती कामामुळे एकेरी वाहतूक
दुरुस्ती कामामुळे या रस्त्यावर एकेरी वाहतूक करण्यात आल्याने जुनी सांगवी व परिसरातील नागरिकांना जिल्हा रुग्णालय रस्ता कामगार वसाहत मार्गे, फेमस चौक, साई चौक असा वळसा घालून यावे लागत आहे. ऐन पावसाळ्यात एकेरी वाहतुकीमुळे नागरिकांना कोंडीचा त्रास सहन करावा लागत आहे.

‘‘विकासकामे नागरिकांच्या हिताचीच असतात. मात्र, ती गुणवत्तापूर्ण व वेळेत होणे गरजेचे असते. आधीच एक वर्ष नागरिकांना त्रास सहन करावा लागला आहे. काही शाळा सुरू झाल्या आहेत. काही शाळा १५ जूनपासून सुरू होत आहेत. या रस्त्यावर मोठी वर्दळ असते. दुरुस्ती कामे लवकर उरकून रस्ता खुला करावा.
- एक पालक

‘‘येथील तडे गेलेल्या ठिकाणी कॉंक्रिटीकरण करण्यात आले आहे. पदपथाचे काम सुरू आहे. येत्या आठ दिवसांत येथील काम पूर्ण होईल.
जयकुमार गुजर, अभियंता, स्थापत्य विभाग

फोटोः 18043