पिंपळे निलख मुख्य रस्त्यावर धोकादायक खड्डे

जुनी सांगवी, ता. ११ ः पिंपळे निलख मुख्य रस्त्यावर धोकादायक खड्डे पडल्याने नागरिकांना रहदारीसाठी कसरत करावी लागत आहे. येथील विशालनगर रस्त्यावर ठिकठिकाणी मोठे खड्डे पडल्याने अपघाताचा धोका आहे. येथून जाताना ज्येष्ठ नागरिक, महिला दुचाकीस्वारांना कसरत करावी लागत आहे. विशालनगर डीपी सिमेंट रस्त्यावर चेंबरभोवती मोठा खड्डा पडल्याने पावसाच्या पाण्यात खड्डा नजरेस येत नसल्याने गाड्या आदळण्याचे प्रकार घडत असल्याने परिसरातील रस्त्यावरील खड्डे दुरुस्ती करण्यात यावी, अशी मागणी होत आहे.

‘‘येथील दुरुस्ती कामासाठी वेळोवेळी मागणी करूनही प्रशासनाकडून दुर्लक्ष करण्यात येत आहे. गतिरोधक व दगडी गट्टू निघाल्याने मोठे खड्डे पडले आहेत.
- प्रदीप खुडे, नागरिक

‘‘येथील रस्त्यावरील खड्डे दुरुस्ती कामे आठवड्याभरात पूर्ण करण्यात येतील.
- अमोल पाचगणे, अभियंता, स्थापत्य विभाग