रथातून बैलांची मिरवणूक काढत सांगवीत बैलपोळा साजरा

जुनी सांगवी, ता. ३ ः शेतकऱ्यांचा घरातील एक सदस्य या नात्याने शेतकरी कुटुंब पशुधनावर प्रेम करतात, हे सर्वश्रुत आहे. पण, यापुढे जाऊन आता सणांचा ट्रेंडच बदलत चालला आहे. सध्या बैलगाडा शर्यतीची तरुणाईला असलेली भुरळ व पशुसंवर्धन व जतन करण्याची अनेकांना आवड आहे. गावगाड्यात प्रत्येक घरी काहीनाकाही पशुधन नियमित असायचे. गावे उपनगर विकासाच्या प्रवाहात येत असताना येथील शेती नामशेष झाली तसे पशुधन दुर्मिळ होत गेले. आता स्मार्ट सिटीत बैलपोळा मिरवणुका म्हटलं तरी कुतूहल वाटते.
जुनी सांगवीत शंभू ग्रुपकडून आकर्षक दिव्यांची विद्युत रोषणाईची आरास केलेल्या रथातून बैलांची डिजेच्या वाद्यात मिरवणूक काढली. ग्रुपच्या रूपेश पुजारी, प्रतीक ढोरे, स्वप्नील शिंदे यांनी सजवलेल्या रथातून बैलांची मिरवणूक काढण्यात आली. याचबरोबर रुद्र ग्रुप चंद्रमणी नगर, पाखऱ्या ग्रुप आनंद नगर यांनी डिजेच्या वाद्यात मिरवणुका काढल्या. शहरात प्रथमच सजवलेल्या रथातून बैलांची मिरवणूक काढण्यात आल्याने ही मिरवणूक पाहण्यासाठी गर्दी झाली होती.