नागरिकांच्या तक्रारीनंतर पोलिस प्रशासन जागे बावधन येथील उद्योजकाच्या पार्टीचे प्रकरण

पिंपरी, ता. ११ : बावधनमधील कोकाटे वस्ती येथे रात्री दहानंतर मोठ्या आवाजात ध्वनिवर्धक लावून ध्वनी प्रदूषण करण्याची घटना रविवारी (ता. ८) घडली होती. नागरिकांच्या तक्रारी आणि पाठपुराव्यानंतरच पोलिसांनी अखेर गुन्हा नोंदवला.
एरवी किरकोळ कारणांवरून सर्वसामान्यांना वेठीस धरणारे पोलिस प्रशासन बड्या उद्योजकांबाबत नरमाईची भूमिका घेत असल्याचे चित्र बावधनमधील कोकाटे वस्ती येथे दिसले. वेंकिज कंपनीचे संचालक बालाजी राव यांच्या वाढदिवसानिमित्त या कार्यक्रमाचे आयोजन करण्यात आले होते. यावेळी लावलेल्या साउंडच्या भिंतींमुळे परिसरात ध्वनी प्रदूषण झाले. मोठ्या आवाजामुळे परिसरातील रहिवाशांना मनस्ताप सहन करावा लागला.
या पार्टीची जागा असलेले मैदान म्हणजे राखीव वनक्षेत्र आहे. अनेक वन्य जिवांचा अधिवास तेथे आहे. या परिसरातच ‘एनडीए’ आहे. असे असतानाही येथे पार्टी कशी होऊ शकते, असा प्रश्न उपस्थित करत नागरिकांनी पोलिस ठाण्यात धाव घेतली. तोपर्यंत गुन्हा दाखल करण्यात आला नव्हता. नागरिकांनी पाठपुरावा केल्यानंतरच पोलिस प्रशासनाला दखल घेणे भाग पडले. त्यामुळे आयोजक वेंकीज कंपनीचे सरव्यवस्थापक आदिनाथ संभाजी मते (रा. वेंकटेश्वरा हाऊस, पुणे) यांच्यावर गुन्हा दाखल करण्यात आला.

‘‘बावधन येथील पार्टी प्रकरणी एकावर गुन्हा दाखल करण्यात आला आहे. तपासाचा भाग म्हणून आठ जणांना नोटीस बजावली आहे. येथून पुढे अशा घटना होणार नाहीत, यासाठी खबरदारी घेऊ.

- अनिल विभूते, वरिष्ठ पोलिस निरीक्षक, बावधन पोलिस ठाणे
------