चौकाचौकांतील ‘दादांचा कट्टा’ बकाल

जुनी सांगवी, ता. १४ : जुनी सांगवी येथे महापालिकेच्या वतीने मॉडेल वार्ड संकल्पनेतून २०१४ ते २०१७ दरम्यान रस्त्याकडेला चौकांमधून उभारण्यात आलेली ‘विसावा ठिकाणे’ अर्थात ‘दादांचा कट्टा’ बकाल अवस्थेत आहेत. ऊन-वारा-पावसात पादचारी, ज्येष्ठ नागरिक, इतर सर्वांचेचे संरक्षण व्हावे या हेतूने मुख्य चौक व रस्त्याकडेला या विसावा ठिकाणांची निर्मिती करण्यात आली होती.
पिंपरी चिंचवड महापालिकेच्या वतीने जुनी सांगवी २०१४ ते २०१७ या काळात मॉडेल वार्ड या संकल्पनेतून परिसरात विविध कामे करण्यात आली. या अंतर्गत सार्वजनिक ठिकाणी मेघडंबरी आकाराचा निवारा करण्यात आला. २०१७ नंतर या संकल्पनेला दुर्लक्षित केले गेल्याने कट्ट्यांची दुरावस्था झाली आहे. २०१४ ते २०१७ या कालावधीत जुनी सांगवी येथे शहरातील पहिली पर्यावरणपूरक शवदाहिनी, अंतर्गत रस्ते व चौकांचे सुशोभीकरण करून आकर्षक वाहतूक बेटांची निर्मिती करण्यात आली. मुख्य रस्त्याकडेला ‘दीपमाळ’ संकल्पनेतून विद्युत प्रकाश व्यवस्था, दादांचा कट्टा ही संकल्पना जुनी सांगवीत राबविण्यात आली होती. शिवसृष्टी उद्यान कोपरा, जयमाला नगर मुख्य चौक, वसंतदादा पाटील पुतळा बसस्थानक मुख्य चौक, प्रियदर्शनीनगर छावा चौक, माहेश्वरी चौक या ठिकाणी मेघडंबरी आकारांचे दादांचे कट्टे उभारण्यात आल होते. आता तुटलेल्या फरशा, रंग उडालेली मेघडंबरी, अस्वच्छता व सोयी सुविधा नसल्याने या कट्टयांना बकालपणा आला असून कट्टे ओसाड पडले आहेत. तर काही ठिकाणी अजूनही यांचा उपयोग केला जात आहे. मात्र, या कट्टयांचे सुशोभीकरण करण्यात यावे, उन्हाळ्यात या कट्टयांचा पादचारी, ज्येष्ठ नागरिक विसाव्यासाठी उपयोग करतात. तेथे पिण्याचे पाणी, वाचनासाठी नियमित पेपर, बसचे वेळापत्रक अशी व्यवस्था करावी. स्थानिक मंडळे सामाजिक संस्था यांना याची देखभाल द्यावी, अशी मागणी होत आहे.

विसावा ठिकाणे ही संकल्पना चांगली असली तरी त्याची देखभाल व सुशोभीकरण करण्यात आले नसल्याने दुरवस्था झाली आहे.
- स्वामिनी जाधव, नागरिक.

पावसाळ्यात, उन्हाळ्यात हे कट्टे पादचारी आणि ज्येष्ठांसाठी उपयोगी ठरतात. येथे सुशोभीकरण करून सुविधा उपलब्ध करून देण्यात याव्यात.
- रुपेश पुजारी, नागरिक

जुनी सांगवी परिसरातील विसावा ठिकाणांची पाहणी करून त्यांच्या डागडुजीबाबत स्थानिक पातळीवर चर्चा करून निर्णय घेण्यात येईल.
- प्रशांत कोटकर, अभियंता, स्थापत्य ‘ह’ प्रभाग