प्राधिकरणातील नागरिकांनी अनुभवले विधिमंडळ अधिवेशनाचे कामकाज निगडी-आकुर्डीतील नागरिकांचा सहभाग; पहिलाच अनुभव

मुंबई, ता. १० : राज्य विधिमंडळाचे पावसाळी अधिवेशन मुंबईत सुरू आहे. त्याचे कामकाज शुक्रवारी (ता. १०) निगडी-आकुर्डी प्राधिकरणातील (पिंपरी-चिंचवड नवनगर विकास प्राधिकरण) नागरिकांनी अनुभवले. अधिवेशनाचे कामकाज कशा पद्धतीने चालते, हे आम्ही पहिल्यांदाच अनुभवल्याचे त्यांनी ‘सकाळ’ला सांगितले.
राज्य विधिमंडळाचे वर्षातून साधारणतः तीन अधिवेशने होतात. पावसाळी अधिवेशन मुंबईत आणि हिवाळी अधिवेशन नागपूरला होते. अर्थसंकल्पीय अधिवेशन फेब्रुवारी-मार्चमध्ये होते. त्यामध्ये राज्याचा वार्षिक जमा-खर्च अर्थमंत्री मांडतात. प्रत्येक अधिवेशनात राज्याच्या विकासाची ध्येयधोरणे, विकासाची दिशा ठरत असते. विधेयके संमत होत असतात. अनेक विषयांवर चर्चा होते. विधानसभा व विधान परिषद सदस्य (आमदार) आपापल्या भागातील प्रश्न उपस्थित करतात. त्यावर संबंधित मंत्री उत्तर देत असतात. सरकारच्या निर्णयांवर विरोधी पक्ष आक्षेप घेऊन सरकारवर अंकुश ठेवण्याचा प्रयत्न करतो. विशिष्ट विषयांवर चर्चा करणे आणि निर्णय घेणे, हाही अधिवेशनाचा उद्देश असतो. मात्र, हे सर्व वर्तमानपत्रात वाचून किंवा टीव्हीवर बघून माहिती होते. पण, प्रत्यक्ष कामकाज कसे चालते? लक्षवेधी म्हणजे काय? तारांकित प्रश्न काय असतो? चर्चा कशा पद्धतीने होते? मंत्री कशा पद्धतीने उत्तरे देतात? हे सर्व प्रत्यक्ष जाणून घेण्याची उत्सुकता असल्याचे निगडी-आकुर्डी प्राधिकरणातील नागरिकांशी बोलताना जाणवले. अधिवेशनातील एक सत्र पाहून सर्व जण विधान भवनातून बाहेर पडले. आठवण म्हणून त्यांनी विधान भवनाच्या पायऱ्यांवर फोटो सेशन केले. अधिवेशनाच्या अनुभवाबद्दल त्यांना विचारले असता, सर्वांनी समाधान व्यक्त केले. विधानसभेचे कामकाज कसे चालते? हे पाहण्यासाठी पहिल्यांदाच आल्याचे त्यांनी सांगितले. यामध्ये विकास सोनवणे, प्रशांत काळे, बाळासाहेब धुमाळ, जनार्दन शिंदे, नंदलाल विसपुते, गिरीश देशपांडे आदींचा समावेश होता. दादा भुसे, आशिष शेलार, भास्कर जाधव, जयंत पाटील यांना सभागृहात बोलताना प्रत्यक्ष पाहिल्याचे सोनवणे यांनी सांगितले.

फोटोः 30330