ताशाची तर्री अन् ढोलाच्या ठेक्याची तरुणाईला भुरळ

जुनी सांगवी, ता. २२ ः जुनी सांगवी, दापोडी, नवी सांगवी परिसरात ढोल ताशांचा निनाद घुमू लागला आहे. गणेशोत्सवातील वादनासाठी परिसरातील ढोल ताशांच्या पथकांकडून वाद्य पूजन करून ढोल- ताशा वादन सरावाची सुरवात करण्यात आली आहे. महाविद्यालयीन तरुण - तरुणींचा मोठ्या संख्येने वादन कलेत उत्स्फूर्त सहभाग दिसून येत आहे.
सांगवीतील मोठी मंडळे गणेशोत्सव व इतर सण उत्सवांसाठी विविध भागांत ढोल ताशा पथके वादन करत असतात. गणेशोत्सवात ढोल ताशा वादनाची तरूणाईंमध्ये मोठी उत्सुकता असते. अनेकजण नोकरी, शिक्षण सांभाळून पथकांत सहभागी होत असतात. वादनाच्या उत्पन्नातून अनेक मंडळे सामाजिक उपक्रम राबविताना दिसतात. जुनी सांगवीतील मल्हार ढोल ताशा पथक, शिवशक्ती मंडळाचे शिवशक्ती ढोल ताशा पथक, मधुबन येथील स्वराज्य पथक, अशी प्रमुख ढोल ताशा पथके आहेत. येथील पीडब्ल्यूडी मैदान परिसरात आपापल्या सोयीप्रमाणे विविध मंडळे दरवर्षी सराव वादन करत असतात. त्यानुसार सोशल मीडियाद्वारे ढोल ताशा पथकांकडून सहभाग व प्रवेशासाठी तरुणाईला आवाहन करण्यात येत आहे. पथकांकडून नवनवीन चाली तयार केल्या जात आहे.
जुनी सांगवी येथील सुवर्णयुग मित्र मंडळाने विविध मराठी चित्रपटांसाठीही वादन केले आहे. या मंडळाच्या वादनात सहभागी होण्यासाठी तरुणाईचा मोठा ओढा असल्याचे पाहायला मिळत आहे. दरवर्षी नवनवीन चाली व संबळ, ढोल, ताशा या वाद्यांचा सुरेख समावेश असल्याने या पथकाच्या वादनाची तरूणाईंस भुरळ पडते.
पिंपळे गुरव येथील शिवादित्य ढोल ताशा पथकाचा वादन सराव सुरू झाला आहे. दापोडीतील शिवशाही पथकाला राज्यभर मागणी असते. जुनी सांगवीतील आनंदनगर मित्र मंडळाचे गणेशा ढोल ताशा पथकाच्या वादन मानधनातून वर्षभर सामाजिक उपक्रम राबविले जातात.

- गणेशोत्सवासाठी वाद्य पूजन करून वादन सराव सुरू करण्यात आला आहे. यावर्षीही पथकाच्या माध्यमातून वादनासोबतच सामाजिक उपक्रमावर भर देण्यात येणार आहे. पथकात सहभागी होण्यासाठी तरुणांची मोठी संख्या असते.
- लिओ ज्युल्स, अध्यक्ष, गणेशा ढोल ताशा पथक

ढोल ताशा पथकातील वादनामुळे व्यायाम होतो. या वादन कलेत एक वेगळा आनंद आहे. यातील उत्साहामुळे अनेक तरुणी पथकातून वादन करतात.
- निमिष कांबळे, वादक, जय मल्हार ढोल ताशा पथक

PIM25B20129