चीनमधील व्यक्तीशी संगनमताने फसवणूक करणारा निर्माता अटकेत

पिंपरी, ता. २८ : चीनमधील नागरिकाच्या संपर्कात राहून सायबर फसवणुकीसाठी आपल्या बँक खात्याचा तपशील पुरविल्या प्रकरणी पिंपरी-चिंचवड सायबर पोलिसांनी एका चित्रपट निर्मात्याला अटक केली आहे. अन्य एका गुन्ह्याच्या तपासात हा प्रकार उघडकीस आला. त्यात पुण्यातील डेक्कन पोलिसांनीही तपासात मदत केली.
शिवम बाळकृष्ण संवत्सरकार (रा. एरंडवणे, पुणे) असे आरोपीचे नाव आहे. तो बाम्बिनो नामक चिनी नागरिकाच्या संपर्कात होता. दुसऱ्या गुन्ह्यातील फिर्यादी टी. चिंटू सुबुधी यांनी फसवणूक प्रकरणी फिर्याद दिली होती. त्यांनी गुंतवणुकीचे आमिष दाखवणाऱ्या एका अ‍ॅपवर नोंदणी केली होती. सुरवातीला थोडी गुंतवणूक केल्यानंतर त्यांना काही दिवसांतच पाच कोटी १५ लाख रुपयांचा नफा असल्याचे दाखविण्यात आले, मात्र पैसे काढण्याचा प्रयत्न करताच विविध शुल्कांच्या नावाखाली त्यांच्याकडूनच पैशाची मागणी होऊ लागली. ५७ लाख ७० हजार रुपयांची फसवणूक झाल्यावरून त्यांनी सायबर पोलिस ठाण्यात तक्रार दाखल केली.
या तपासात आरोपीने वापरलेले आयडीएफसी बँकेतील खाते पुण्यातील ‘बालाजी एन्टरप्रायझेस’ या नावाने सुरू करण्यात आल्याचे आढळले. त्यावरून पोलिसांनी डेक्कन पोलिस ठाण्याच्या मदतीने आरोपीचा शोध घेण्यात आला. शिवमने आधी गैरकृत्याचा इन्कार केला. ‘मी चित्रपट निर्माता आहे, असे काम कशाला करेन,’ असे तो म्हणत होता. सखोल तपासात त्याने चिनी व्यक्तीच्या सांगण्यानुसार खाते उघडले व फसवणुकीसाठी वापरल्याची कबूल दिली.
-------