जुनी सांगवीत खंडित वीजपुरवठ्याचे सत्र सुरूच

जुनी सांगवी, ता.३१ ः जुनी सांगवी परिसरात मागील काही दिवसांपासून वारंवार वीजपुरवठा खंडित होत असल्याने स्थानिक रहिवासी प्रचंड हैराण झाले आहेत. विशेषतः दैनंदिन वापराच्या वेळेतच वीज गायब होत असल्याने घरगुती कामांपासून ते कार्यालयीन ऑनलाइन कामकाजावर मोठा परिणाम होत आहे. त्यामुळे संतप्त सांगवीकरांनी गुरुवारी (ता.३१) महावितरणच्या कार्यालयात जाऊन आंदोलन केले.
सांगवी परिसरात सध्या पाणीपुरवठा सुरळीत आहे. मात्र, वारंवार खंडित होणाऱ्या विजेअभावी नागरिकांना पिण्याचे पाणी साठवणूक करता येत नाही. घरांमध्ये पाणीसाठा करताना अडचणी निर्माण होत आहेत. वीजपुरवठा कधी जाईल ? कधी येईल ? याचा काहीही ठावठिकाणा नसल्यामुळे नागरिकांमध्ये संभ्रम आणि संताप आहे.

अभ्यास विस्कळीत
विजेअभावी गृहिणी आणि विद्यार्थांचे हाल होत आहेत. विद्यार्थ्यांचे अभ्यासाचे वेळापत्रक विस्कळीत झाले आहे. अनेक जण ‘वर्क फ्रॉम होम’ करीत आहेत. परंतु वीज गेल्यानंतर नेटवर्क, संगणक, उपकरणे बंद पडतात. त्यामुळे वेळ आणि काम दोन्ही वाया जात आहे. याशिवाय, व्यावसायिकांच्या व्यवसायावरही परिणाम होत आहे.

महावितरणकडून दुर्लक्ष
अनेक वेळा महावितरण कार्यालयात नागरिकांनी तक्रारी केल्या. मात्र, वीजपुरवठा का खंडित होत आहे, याची स्पष्ट माहिती दिली जात नाही. तसेच कोणतीही पूर्वसूचना न देता अचानक वीज गायब होते. महावितरणकडून फोन उचलला जात नाही. वारंवार खंडित होणाऱ्या वीजपुरवठ्यामुळे गुरुवारी (ता.३१) सांगवीतील रहिवाशांनी महावितरण कार्यालयात जाऊन आंदोलन केले. वीजपुरवठा सुरळीत करण्यात यावा, याबाबत महावितरण अभियंता यांच्याकडे लेखी निवेदन दिले.
वीजपुरवठा सुरळीत ठेवावा, नियमित वेळापत्रक प्रसिद्ध करावे, वारंवार होणाऱ्या त्रुटींवर तत्काळ उपाययोजना करावी, मागणी रहिवाशांनी केली. यावेळी मधुबन मित्र मंडळाचे गणेश ढोरे, शारदा सोनवणे, प्रदीप झांजुर्णे, विनायक शिंदे, अमित गवळी, हर्षद मोहारे, विशाल सोमवंशी, हिरेन सोनवणे, जवाहर ढोरे, विकी सोनवणे, सुभाष जाधव, श्रीधर पंडित, संजय देशमुख, प्रदीप देशमुख, अविनाश मारणे, विलास दळवी, सुभाष भोळे, नारायण हिरवे, तुकाराम हाडोळे आदी उपस्थित होते.