जुनी सांगवीमधील शितोळेनगर चौक ‘टकाटक’

सकाळ इम्पॅक्ट

जुनी सांगवी, ता.६ ः सांगवी येथील शितोळेनगर चौक रस्त्यावरील निखळलेले पेव्हिंग ब्लॉक व रस्त्यावर पडलेल्या खड्ड्यांची महापालिका स्थापत्य विभागाकडून दुरुस्ती करण्यात आली आहे. त्यामुळे तेथील रहदारी सुकर होण्यास मदत होणार आहे.
जुनी सांगवीतील शितोळेनगर रस्ता हा पुणे, औंध, सांगवी फाट्याकडे ये - जा करण्याचा मुख्य मार्ग आहे.
त्यावर शाळा, महाविद्यालय, हॉटेल, खानावळी आहेत. त्यामुळे या रस्त्यावर वाहनांची संख्या दिवसेंदिवस वाढत आहे.मात्र, गेल्या अनेक दिवसांपासून शितोळेनगर चौकाची दुरवस्था झाली होती. याबाबत ‘सकाळ’ मध्ये ‘सांगवीतील शितोळेनगर चौकाची दुरवस्था’ या शीर्षकाखाली बातमी प्रसिद्ध करण्यात आली होती. मुख्य रस्त्यांवरील खड्डे, गटारांच्या झाकणांचा उंचवटा, तुटलेले झाकण, निखळलेले पेव्हिंग ब्लॉक यामुळे या मुख्य रस्त्याची दुरवस्था झाली होती. परिणामी, खड्डे चुकविण्याच्या नादात किरकोळ अपघात घडत होते. त्याबाबत स्थानिक नागरिकांकडून वारंवार तक्रारी करण्यात येत होत्या. मात्र, प्रशासनाकडून दुर्लक्ष होत होते.
स्थानिक रहिवासी रुपेश पुजारी म्हणाले,‘‘या कामामुळे स्थानिक नागरिकांमध्ये समाधानाचे वातावरण आहे. आमच्या रोजच्या समस्येला ‘सकाळ’कडून वाचा फोडण्यात आली. ‘सकाळ’च्या बातमीमुळेच हे काम झाले. त्याबद्दल विशेष आभार मानतो.’’

PIM25B20202, PIM25B20203