श्री जिव्हेश्वर जन्मसोहळा उत्साहात

पिंपरी, ता. १२ : साळी समाजाच्या वतीने या वर्षीही भगवान श्री जिव्हेश्वर जन्मोत्सव मोठ्या उत्साहात साजरा करण्यात आला. चिंचवडगाव येथील प्रभू रामचंद्र सभागृहात सोहळ्यासाठी परिसरातील समाज बांधव मोठ्या संख्येने उपस्थित होते. प्रमुख पाहुणे म्हणून सुहास कांबळे अध्यक्ष म्हणून अरुण कांबळे तसेच विशेष अतिथी म्हणून सुचिता पाटेकर, गणेश लांडगे आदी उपस्थित होते.
मुख्य कार्यक्रमाचा प्रारंभ प्रमुख मान्यवरांच्या हस्ते दीपप्रज्वलन तसेच भगवान श्री जिव्हेश्वर पूजन व आरती करून करण्यात आली. अरुण कांबळे व सुहास कांबळे यांनी भाषणात शिक्षण किती महत्त्वाचे आहे, हे आवर्जून सांगितले. शिक्षण क्षेत्रातील रोजगाराच्या संधी या संदर्भात माहिती सांगितली. या कामी सर्वतोपरी सहकार्य करण्याचे आश्वासन दिले. परिसरातील ५५ शिक्षण क्षेत्रातील समाज बांधवांचा प्रमुख पाहुण्यांच्या हस्ते मानपत्र देऊन सत्कार करण्यात आला. ज्येष्ठ समाज बांधव लक्ष्मण साळी, दत्तात्रेय रोखडे, परशुराम पांगारकर, मधुकर सातपुते, उद्धव जुंदरे यांना ‘जीवन गौरव’ तसेच ज्येष्ठ भगिनी सुशीला आंबेकर, शांताबाई भागवत, बाबुताई पराळे यांना ‘आदर्श माता’ पुरस्कार देऊन विशेष सत्कार करण्यात आला. मान्यवरांच्या हस्ते गुणवंत विद्यार्थ्यांचा सत्कार शालेय साहित्य वाटप करून करण्यात आला. मान्यवरांनी भाषणात कार्यकर्त्यांचे कौतुक करून समाज एक संघ राहावा म्हणून प्रयत्न करण्याचे आवाहन केले.
कार्यक्रम यशस्वी करण्यासाठी शरद जालिंद्रे, धनंजय भागवत, रामदास एखे, कैलास एखे, नीलेश धारणकर, अशोक जंत्रे, सचिन बिचकर, नितीन साळी, लक्ष्मण बोटके, रूपेश साळी इत्यादींनी अथक परिश्रम घेतले. सूत्रसंचालन समाजाचे अध्यक्ष विष्णू निचळ यांनी केले. आभार किशोर दिवाणे यांनी मानले.