चिंचवडच्या अधिकाऱ्याकडे भोसरी कार्यालयाचा कार्यभार

पिंपरी, ता. १९ : भोसरी शिधापत्रिका कार्यालयाच्या कारभारात महत्त्वाचा प्रशासकीय बदल करण्यात आला आहे. भोसरी परिमंडळ अधिकारी गजानन देशमुख हे लाचलुचपत प्रतिबंधक विभागाच्या (एसीबी) कारवाईत अडकले. त्यामुळे या कार्यालयाचा अतिरिक्त कार्यभार चिंचवड परिमंडळ अधिकारी विजय कुमार क्षीरसागर यांच्याकडे सोपवण्यात आला आहे. लाचलुचपत विभागाच्या कारवाईनंतर देशमुख यांना पदावरून दूर ठेवण्यात आले आहे. या पार्श्वभूमीवर भोसरी कार्यालयाचा दैनंदिन कारभार विस्कळित होऊ नये, यासाठी प्रशासनाने हा निर्णय घेतला. भोसरी परिसरातील हजारो लाभार्थ्यांचे शिधापत्रिका नूतनीकरण, नवीन शिधापत्रिका मंजुरी, धान्य वितरण, नाव दुरुस्ती, उत्पन्न दाखला व संबंधित कामे या कार्यालयामार्फत केली जातात. अधिकारी नसल्याने नागरिकांचे काम खोळंबू नये, यासाठी हा पर्याय अवलंबण्यात आला. लवकरच स्वतंत्र नवीन परिमंडळ अधिकारी नियुक्त करण्यात येणार असल्याची माहिती सूत्रांनी दिली.
-----