पिंपळे सौदागरमधील ‘डीपी’ रस्त्याचे काम अंतिम टप्प्यात
विजय गायकवाड ः सकाळ वृत्तसेवा
पिंपळे सौदागर, ता. २८ ः पिंपळे सौदागर परिसरातील अनेक वर्षे रखडलेल्या विकास आराखड्यातील सुमारे १५ कोटी रुपये खर्चाच्या १८ मीटर रुंदी आणि सुमारे ११०० मीटर लांबीच्या मुख्य रस्त्याच्या कामाला वेग आला आहे. संरक्षण भिंत आणि गटारींच्या कामांसह रस्त्याचे सिमेंट काँक्रीटीकरण सत्तर टक्के पूर्ण झाले आहे. येत्या काही महिन्यांत संपूर्ण रस्ता वाहतुकीसाठी खुला होण्याची अपेक्षा आहे. त्याने सुमारे १.५ किलोमीटरचे अंतर वाहनचालकांना फक्त २ मिनिटांत पार करता येणार आहे.
मागील काही वर्षांपासून विकास आराखड्यातील १८ मीटर रुंद रस्त्याचे काम सुरू आहे. सध्या रस्त्याचे काँक्रीटीकरण, संरक्षण भिंती व साईड गटारी यांची टप्प्याटप्प्याने कामे सुरू आहेत. मुख्य रस्त्याच्या सिमेंट काँक्रीटीकरणाचे काम युद्धपातळीवर सुरू आहे. क्रिस्टल हॉटेल, ट्राईज सोसायटी ते नॅचरल आईस्क्रीम ‘डीपी’ रस्त्याला जोडणारा हा मार्ग आहे. संरक्षण भिंत उभारणीचे काम ९० टक्के पूर्ण झाले असून साईड वॉल, गटारे आणि पादचारी मार्ग यांचे कामही अंतिम टप्प्यात आले आहे. या रस्त्याच्या पूर्णत्वानंतर नागरिकांना वाहतूक कोंडीपासून कायमस्वरूपी मुक्ती मिळणार आहे.
काय होणार फायदे ?
- कोकणे चौक, गणेश गार्डन, मुख्य रस्त्यावरील कोंडी सुटण्यास मदत
- ठराविक मार्गांवरील ताण कमी होणार,
- वाहतुकीचा वेग, वाहनचालकांचा वेळ वाचणार
- पादचाऱ्यांसाठी दोन मीटर रुंदीचा पदपथ
- रस्त्याच्याकडेला १० फूट उंच संरक्षण भिंत
विविध विभागांत समन्वय
रस्त्याच्या कामासाठी संरक्षण विभाग, जलविभाग, महावितरण आणि स्थानिक प्रशासनाच्या समन्वयाने काम सुरू असून येत्या काही महिन्यांत हा मार्ग नागरिकांच्या वापरासाठी खुला होईल, असे प्रशासनाकडून सांगण्यात आले आहे. या मार्गाच्या पूर्णत्वामुळे हजारो नागरिकांचा प्रवास सुखकर आणि सुलभ होणार आहे.
संरक्षण विभागाच्या नवीन संरक्षण भिंतीचे काम पूर्ण करण्यात आले असून आधीची जुनी भिंत हटविण्यात आली आहे. सद्यस्थितीत रस्त्याचे सुमारे ७० टक्के काम पूर्ण झाले असून उर्वरित काम अंतिम टप्प्यात आहे. ऑक्टोबर महिन्याच्या अखेरपर्यंत हा रस्ता नागरिकांच्या वाहतुकीसाठी पूर्णपणे खुला केला जाणार आहे. सध्या या मार्गावर दुचाकी वाहनांची चाचणी सुरू करण्यात आली असून लवकरच सर्व प्रकारच्या वाहनांसाठी मार्ग खुला होईल.
- देवन्ना गट्टूवार, कार्यकारी अभियंता, महापालिका
या रस्त्याचे काम इतक्या वर्षांनंतर पूर्णत्वाकडे जात आहे, हे पाहून खूप आनंद वाटतो. रोजच्या वाहतूक कोंडीने नागरिक त्रस्त झाले होते. पण आता हा नवीन रस्ता खुला झाल्यानंतर वेळेची बचत होणार आहे. प्रवास सुलभ होणार आहे. पावसाळ्यात साचणारे पाणी आणि खराब रस्त्यांमुळे होणारा त्रास आता टळेल.
- संदीप काटे, सामाजिक कार्यकर्ते
PMG25B02638
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.