फ्रेंड्स ट्रेकिंग क्लबने तारामती शिखर केले सर

पिंपरी, ता. २ : फ्रेंड्स ट्रेकिंग क्लबने ४०वे ट्रेक २७ व २८ जानेवारी रोजी हरिश्चंद्रगडावरील तारामती शिखर सर करून पूर्ण केले. या ट्रेकमध्ये ३३ लहान-मोठ्या अबालवृद्ध सदस्यांनी सहभाग घेतला होता. या वेळी ऋत्वी हिंगणे या पाच वर्षाच्या तसेच, दूर्वा विसपुते या नऊ वर्षाच्या बाल विरंगणेने तारामती शिखर सर केले.

ऋत्वीच्या या यशामध्ये तिची आई सारिका हिंगणे खंबीरपणे उभी होत्या. विसवास सोहनी या ७० वर्षाच्या ज्येष्ठ नागरिकानेही तारामती शिखर सर केले. शशिकांत कुलकर्णी, संगीता कुलकर्णी, अलका कांबळे, शंकर राणे, श्रीकांत कदम, मधुकर देवकर, साईनाथ उदगीर, रावसाहेब कडुस, शरद चव्हाण व सुधाकर मकासरे या ज्येष्ठ नागरिकांनी तरुणांना लाजवेल अशा रीतीने कामगिरी करून ट्रेक यशस्वीरीत्या पूर्ण केला.

अहमदनगर जिल्ह्यातील, अकोले तालुक्यातील पाचनई गावामधून ठीक सकाळी ट्रेकिंगला सुरुवात झाली. फ्रेंड्स ट्रेकिंग क्लबचे अध्यक्ष वसंत ठोंबरे यांनी सर्व सदस्यांचे स्वागत करून ट्रेक व सुरक्षिततेच्या सर्व नियमांचे पालन करावे व शून्य अपघाताचे ध्येय डोळ्यासमोर ठेवण्याच्या सूचना दिल्या. जय भवानी, जय शिवाजी या घोषणेचा निनाद करून ट्रेकिंगला सुरुवात झाली. मोहिमेचे ट्रेक लीडर म्हणून जयसिंग कांबळे, कालिदास सूर्यवंशी, सुहास आढाव व लहू तावरे यांचे मोलाचे सहकार्य लाभले.