जगताप यांच्या प्रचारासाठी नीतेश राणे यांचा मेळावा

पिंपरी, ता. १७ : चिंचवड विधानसभा मतदारसंघाच्या पोटनिवडणुकीतील भाजप व मित्र पक्ष महायुतीच्या उमेदवार अश्विनी लक्ष्मण जगताप यांच्या प्रचारासाठी भाजपचे आमदार नीतेश राणे यांनी कोकणवासीयांसोबत संवाद साधला. शहरात राहण्यास असलेल्या सिंधुदुर्ग जिल्ह्यातील तसेच कोकणच्या अन्य भागातील प्रत्येक मतदारांपर्यंत पोहोचून त्यांनी जगताप यांचा प्रचार केला. सांगवी येथे कौटुंबिक स्नेह मेळावा घेऊन, अश्विनी जगताप यांना मोठ्या मताधिक्याने विजयी करण्याचे आवाहन केले.
आमदार राणे यांनी चिंचवडगाव, सांगवी, रहाटणी, काळेवाडी आणि थेरगावसह मतदारसंघाच्या सर्वच भागात जाऊन, कोकणवासीयांसोबत संवाद साधला. काही प्रमुख नागरिकांच्या घरी जाऊन, त्यांनी त्या भागातील कोकणी माणसांसोबत निवडणुकीविषयी चर्चा केली. त्यांच्या उपस्थितीत सांगवीमध्ये सिंधुदुर्ग जिल्हा मंडळाच्या कौटुंबिक स्नेह मेळाव्यात त्यांनी कोकणवासीयांना मार्गदर्शन केले. यावेळी सिंधुदुर्ग जिल्हा मंडळाचे अध्यक्ष अजय पाताडे, माजी नगरसेविका सुजाता पालांडे, माजी नगरसेवक प्रमोद ताम्हणकर, सुनील पालकर, ॲड. चंद्रकांत गायकवाड, सिंधुदुर्ग जिल्हा मंडळाचे शहरातील सर्व पदाधिकारी व कार्यकर्ते उपस्थित होते.
आमदार राणे म्हणाले, ‘‘दिवंगत आमदार लक्ष्मण जगताप यांनी चिंचवड मतदारसंघात विकासकामांचा डोंगर उभा केला आहे. आपला मतदारसंघ विकासाच्या बाबतीत राज्यात सर्वात पुढे असावा, याचे स्वप्न पाहून त्यांनी काम केले. त्यांनी आपल्या मतदारसंघाचा कायापालट केला. मतदारसंघातील हा विकास थांबता कामा नये. त्यांच्या पत्नी अश्विनी जगताप या पती लक्ष्मण जगताप यांचे विकासाचे स्वप्न पूर्ण करण्यासाठी पोटनिवडणूक लढवत आहेत. आपण सर्व कोकणवासीयांना त्यांच्या पाठीशी ठामपणे उभे राहावे.’’

फोटो ः 25296