आदिशक्तीच्या आगमनाची उत्सकता

पिंपरी, ता. १३ ः नवरात्रोत्सवाला रविवारपासून सुरुवात होत आहे. आदिशक्तीच्या उत्सवासाठी शहरातील विविध मंदिरांमध्ये जय्यत तयारी दिसून येत आहे. आकुर्डी येथील तुळजाभवानी मंदिरातही नवरात्रीची तयारी सुरू आहे. मंदिराचा परिसर सुशोभित केला जात आहे. मंदिराला आकर्षक रोषणाईदेखील करण्यात येत आहे.

नवरात्रातील नऊ दिवस मंदिरात पिंपरी-चिंचवडमधील भाविकांची मोठी गर्दी होते. हे लक्षात घेऊन दर्शन रांग तयार करण्यात येत आहे. आलेल्या भक्तांना उन्हाचा त्रास होऊ नये, यासाठी मांडव टाकला जात आहे. हे मंदिर मुंबई-पुणे महामार्गालगत असल्याने वाहतुकीला अडथळा होऊ नये, यासाठी सुरक्षारक्षकांची नेमणूक करण्यात आली आहे. मंदिर परिसरातील सुरक्षिततेसाठी सीसीटीव्ही कॅमेरेही बसविण्यात आलेले आहेत.

काय केले जाते
- घटस्थापनेच्या दिवशी मंदिरात सकाळी घटस्थापना
- सायंकाळी ध्वजपूजन केले जाते
- नवरात्रातील नऊ दिवस देवीची नऊ रूपे साकारली जातात
- नऊ रंगाच्या साड्या देवीला परिधान केल्या जातात
- सकाळी व सायंकाळी देवीची आरती केली जाते
- दररोज आजूबाजूच्या परिसरातील भजनी मंडळे भजन सादर करतात
- नवरात्रातील पंचमीला सुक्त पठण केले जाते
- अष्टमीला दुपारी होम केला जातो
- नवरात्रातील नऊ दिवस मंदिरात पहाटेपासून ते रात्री उशिरापर्यंत नागरिक दर्शनासाठी येतात
- पहाटे पाच वाजल्यापासून ते मध्यरात्रीपर्यंत मंदिर खुले ठेवतात

तुळजा भवानी देवीचे हे मंदिर जवळपास तीनशे वर्ष जुने आहे. शहरातील पुरातन मंदिरांपैकी एक आहे. त्यामुळे या परिसरातील नागरिकांचे हे श्रद्धास्थान आहे. नवरात्रात दर्शनासाठी होणारी गर्दी पाहता आम्ही पूर्ण तयारी केली आहे.
- धनंजय काळभोर, विश्‍वस्त, श्री तुळजाभवानी मंदिर ट्रस्ट