राष्ट्रीय पॅरा नेमबाजीमध्ये रवी ओझाला एकेक सुवर्ण, रौप्य

पिंपरी, ता. १७ ः बालेवाडी येथील श्री शिवछत्रपती क्रीडा संकुलात आयोजित पाचव्या राष्ट्रीय पॅरा नेमबाजी (रायफल शूटिंग) अजिंक्यपद स्पर्धेत राजस्थानकडून उत्कृष्ट खेळाचे प्रदर्शन करताना रवी ओझा याने प्रत्येकी एकेक सुवर्ण आणि रौप्यपदकाची कमाई केली. या कामगिरीबरोबरच भारतीय संघाच्या निवड चाचणीसाठीही तो पात्र ठरला आहे.
स्पर्धेत १० मीटर एअर रायफलमध्ये ६०९ तर ५० मीटरमध्ये ५८४ गुण मिळवत त्याने चार अव्वल खेळाडूंमध्ये स्थान मिळविले. पुण्यात राहून अंजली भागवत शूटिंग ॲकेडमीमध्ये आंतरराष्ट्रीय नेमबाज अंजली भागवत, प्रशिक्षक रश्मी त्रिवेदी यांच्या मार्गदर्शनाखाली रवीचा सराव सुरू आहे.
प्रशिक्षक रश्मी त्रिवेदी म्हणाल्या, ‘‘आर्थिक स्थिती नाजूक असल्याने रायफल नसतानाही नाउमेद न होता रवी सातत्याने सराव करत आहे. रवीच्या कामगिरीने आनंद वाटत असून येत्या काळात त्याच्याकडून आणखी चांगली कामगिरी झाल्याचे पाहावयास मिळेल.’’
PNE24U63484