पोलिसांच्या नियोजनामुळे निवडणूक प्रक्रिया शांततेत

पिंपरी, ता. २४ : विधानसभा निवडणुकीदरम्यान कायदा-सुव्यवस्था कायम राहण्यासाठी पिंपरी-चिंचवड पोलिसांनी योग्य नियोजन केल्याने संपूर्ण निवडणूक प्रक्रिया शांततेत पार पडली. मतदान व निकालानंतरही आयुक्तालयाच्या हद्दीत कोणताही अनुचित प्रकार न घडता शांतता कायम राहिली.
निवडणुकीची आचारसंहिता लागू झाल्यापासूनच पोलिसांनी प्रतिबंधात्मक कारवाईवर भर दिला. नाकाबंदी, पथ संचलन, शस्त्र जमा करणे यासह कोम्बिंग ऑपरेशन राबविण्यात आले. सर्वत्र कडेकोट बंदोबस्त तैनात ठेवला होता. यासह सर्व हालचालींवर बारीक लक्ष होते. वरिष्ठ अधिकाऱ्यांकडून वारंवार हद्दीसह पोलिस ठाण्यांना भेट दिली जात होती. सर्व परिस्थितीचा आढावा घेतला जात होता.
तसेच एक पोलिस सहआयुक्त, एक अप्पर आयुक्त, सहा उपायुक्त, नऊ सहायक आयुक्त, ३११ निरीक्षक, सहायक निरीक्षक, उपनिरीक्षक, ३ हजार ९५ अंमलदार, १ हजार होमगार्ड, सीमा सुरक्षा दल, राज्य राखीव पोलिस दलाच्या प्रत्येकी २ कंपन्या, केंद्रीय औद्योगिक सुरक्षा दल, हरियाना पोलिस बंदोबस्तासाठी तैनात होते. पोलिस आयुक्त विनयकुमार चौबे वेळोवेळी आयुक्तालयाच्या हद्दीतील सर्व परिस्थितीचा तसेच सुरक्षा व्यवस्थेचा आढावा घेत होते.
दरम्यान, ही निवडणूक प्रक्रिया शांततेत पार पडली. यासाठी सर्वांचे सहकार्य मिळाल्याबद्दल पोलिस आयुक्तांनीही सर्वांचे आभार मानले.
--------------