पिंपरीत व्यावसायिकाची दीड कोटींची फसवणूक

पिंपरी, ता. ५ : कंपनीत गुंतवणूक केल्यास जादा परताव्याचे आमिष दाखवून व्यावसायिकाची दीड कोटी रुपयांची फसवणूक केल्याप्रकरणी चौघांवर गुन्हा दाखल झाला आहे. हा प्रकार पिंपरी येथे घडला.
या प्रकरणी चंद्रशेखर किसन शिंदे (रा. मासुळकर कॉलनी, पिंपरी) यांनी फिर्याद दिली आहे. त्यानुसार अपर्णा अशोक गिरी (रा. स्वामी विवेकानंद रोड, बिबवेवाडी, पुणे), धर्मा गोल्हार (रा. वाल्हेकरवाडी, चिंचवड), नरेंद्र रमेशचंद्र सेंगर (मृत), आकाश नरेंद्र सेंगर (रा. बिग इंडिया चौक, सेक्टर नंबर २७, रा. प्राधिकरण, निगडी) यांच्यावर गुन्हा दाखल झाला आहे. आरोपींनी फिर्यादी यांना मीडिया आयडिया कंपनीत गुंतवणूक केल्यास जादा परताव्याचे आमिष दाखवले. मात्र, नंतर गुंतविलेल्या पैशांवर काहीही परतावा अथवा गुंतवणूक केलेली रक्कम परत न देता फसवणुकीच्या दृष्टीने खोटी कागदपत्रे तयार केली.
फिर्यादी यांचे गुंतवणूक केलेले ५३ लाख १७ हजार रुपये तसेच या रकमेचे परताव्याचे ९० लाख अशी एक कोटी ४३ लाख १७ हजार रुपये परत न करता फिर्यादी यांची आर्थिक फसवणूक केली. तसेच नरेंद्र यांच्या मृत्यूनंतर त्यांचा मुलगा आकाश हे त्यांची कंपनी चालवीत असून, तोही पैसे परत करण्यास टाळाटाळ करीत असल्याचे फिर्यादीत म्हटले आहे.
------------------------------------