विश्वचषकामध्ये अप्रतिम सांघिक कामगिरी

विश्वचषकामध्ये अप्रतिम सांघिक कामगिरी

पिंपरी, ता.६ ः ‘‘विश्वचषक टी-२० क्रिकेट स्पर्धेमध्ये भारतीय संघाने आपल्या उत्कृष्ट सांघिक कामगिरीने विजेतेपदावर नाव कोरले. सूर्यकुमार यादव याने घेतलेला झेल निर्णायक ठरला. १९८३ च्या विश्वचषकात कपिल देव यांनी घेतलेल्या अप्रतिम झेलाची त्याने आठवण झाली,’’ असे कौतुकोद्‍गार भारतीय क्रिकेट संघाचे माजी कर्णधार दिलीप वेंगसरकर यांनी काढले.
थेरगाव येथील पीसीएमसीज् व्हेरॉक-वेंगसरकर क्रिकेट अकादमीला दिलीप वेंगसरकर यांनी भेट दिली. त्यावेळी ते बोलत होते. विश्वचषक टी-२० स्पर्धेत भारतीय संघाची कामगिरी तसेच प्रशिक्षक राहुल द्रविड यांच्याविषयीही त्यांनी तोंड भरून कौतुक केले.
वेंगसरकर म्हणाले,‘‘विश्वचषक स्पर्धेत भारतीय संघाची कामगिरी खूप छान राहिली. एकही सामना न गमावता आपण अंतिम सामन्यात धडक मारली. तेथेही सांघिक खेळाच्या जोरावर सुरेख पुनरागमन करत विजेतेपदाचे स्वप्न साकार केले. संघातील सर्व खेळाडू आनंदी आणि एकमेकांना सहकार्य करताना दिसते. त्याचाच सकारात्मक परिणाम संघाचा कामगिरीवर झाला.’’
अंतिम सामन्यात यशस्वी जयस्वाल याला सलामीवीर म्हणून खेळायला संधी मिळेल, असे वाटत होते, असे सांगून वेंगसरकर म्हणाले,‘‘परंतु, विराट कोहली याने चांगली खेळी केली. तो मोठा खेळाडू आहे. जसप्रीत बुमराह याचीही गोलंदाजी अप्रतिम झाली. या प्रकारामधून रोहित शर्मा, विराट कोहली, रवींद्र जाडेजा यांनी निवृत्ती जाहीर केली. खरे रोहित, विराट हे दोघे अजूनही खेळले असते. परंतु, संघाने सर्वोच्च कामगिरी केल्यावर किंवा योग्य वेळी निवृत्ती जाहीर करणे हे फार महत्त्वाचे असते. आणि ते त्यांनी केले. जडेजाही यानेही गुणवान अष्टपैलू खेळाडू म्हणून कामगिरी केली.’’
राहुल द्रविड यांचेही कौतुक करताना वेंगसरकर म्हणाले,‘‘ विश्वचषक हा भारतीय संघाला खूप वर्षांपासून हुलकावणी देत होता. मात्र, यावेळी संघाने यश मिळविले. राहुल द्रविड प्रामाणिक आणि आपल्या कामाप्रती एकनिष्ठ आहे. त्याचीही प्रशिक्षक म्हणून चांगली कामगिरी राहिली. योग्य कामगिरी करण्यासाठी उत्तम नियोजन कसे केले जाते, हे दिसून आले. या स्पर्धेनिमित्त हा एक चांगला पायंडा पडावा.’’

ब्रेक घ्या, डोकं चालवा, कोडे सोडवा!

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Marathi News Esakal
www.esakal.com