ज्वेलर्स दुकानावर दरोड्याची तयारी; तिघांना अटक

पिंपरी, ता. ८ : चिंचवडमधील सोनिगरा ज्वेलर्स या दुकानावर दरोड्याच्या तयारीत असलेल्या टोळीतील तिघांना चिंचवड पोलिसांनी अटक केली आहे. चिंचवड रेल्वे स्थानकाजवळ असलेल्या मोकळ्या मैदानाजवळ ही कारवाई करण्यात आली.
सुनील मारुती लोणी (वय २२, रा. बिजलीनगर, नलावडे वस्ती, चिंचवड), समील मोहम्मद बागवान (वय २४, रा. शिवशक्ती कॉलनी, चिंचवडेनगर, चिंचवड), काशिनाथ कल्याण उकली (वय २४, रा. महात्मा फुले नगर, एमआयडीसी भोसरी) अशी अटक केलेल्या आरोपींची नावे आहेत. तर त्यांच्यासह जोयबा बागवान (रा. दगडोबा चौक, चिंचवड), मयूर सुरवळे (रा. महात्मा फुलेनगर, एमआयडीसी, भोसरी) यांच्यावर गुन्हा दाखल झाला आहे.
चिंचवड रेल्वे स्थानकाच्या शेजारी असलेल्या मोकळ्या मैदानात एक टोळके थांबले असून ते दरोडा टाकण्याच्या तयारीत असल्याची माहिती चिंचवड पोलिसांना मिळाली. त्यानुसार, चिंचवड पोलिसांनी रविवारी (ता. ७) दुपारी सापळा लावून तिघांना ताब्यात घेतले. आरोपींकडे दोन तलवार, एक चॉपर, एक कटावणी, मिरची पावडरची पुडी, नायलॉन रस्सी, पाच कापडी मास्क आढळून आले. अटक केलेल्या आरोपींकडे चौकशी केली असता हे आरोपी चापेकर चौकातील सोनिगरा ज्वेलर्स या दुकानावर दरोडा टाकणार असल्याचे समोर आले.

दोन दिवसांत तीन गुन्हे
या गुन्ह्यातील आरोपी सुनील मारुती लोणी याने दोन दिवसांत तीन गुन्हे केल्याचे समोर आले आहे. शनिवारी (ता. ६) सकाळी साडेदहा वाजता किराणा उधार न दिल्याच्या कारणावरून सुनील लोणी याने चिंचवडच्या बिजलीनगर येथील शिवनगरी येथे कोयत्याने दुकानात तोडफोड करत दुकानदार महिलेच्या हातावर कोयता मारला. तसेच धमकी देत शिवीगाळ करत परिसरात दहशत माजवली. त्यानंतर, त्याच दिवशी साडेअकरा वाजता बळवंत चौक, बिजलीनगर येथे अनिकेत विजयकुमार मराठे (रा. बिजलीनगर, चिंचवड) यांची दुचाकी अडवून ‘गाडी दे नाही; तर तुला कापून टाकीन’ अशी भीती घालून फिर्यादीची दुचाकी घेऊन सुनील लोणी पसार झाला. त्यानंतर, रविवारी (ता. ७) दरोड्याच्या तयारीत असताना पोलिसांनी त्याला ताब्यात घेतले.