सीबीआयमधून बोलतोय ! तुमच्यावर गंभीर गुन्हे आहेत...

पिंपरी, ता. ९ : लखनऊ सत्र न्यायालय तसेच सीबीआयमधून बोलत असून तुमच्यावर विविध गंभीर गुन्हे दाखल आहेत, अशी भीती घालून एकाकडून अनोळखी व्यक्तींनी १५ लाख ७४ हजार ६८८ रुपये उकळले. हा प्रकार थेरगाव येथे घडला.
याप्रकरणी थेरगावातील पाटीलनगर येथील ४३ वर्षीय व्यक्तीने वाकड पोलिस ठाण्यात फिर्याद दिली आहे. त्यानुसार, अजय मिश्रा, सीबीआय अधिकारी नाव सांगणारा अनोळखी व्यक्ती, सुरेश कोल्ड वॉटर खातेधारक यांच्यावर गुन्हा दाखल झाला आहे. अनोळखी व्यक्तीने फिर्यादीस फोन करून तो लखनऊ सत्र न्यायालयातून बोलत असल्याचे सांगितले. फिर्यादीवर रावी इन्व्हेस्टमेंट प्रा. लि. या कंपनीची केस आहे. त्यासाठी तुम्हाला कृष्णानगर पोलिस ठाणे लखनऊ येथे यावे लागेल, असे सांगितले. तिथे येणे शक्य नसेल; तर टेलिग्राम ॲप डाउनलोड करणे फिर्यादीला भाग पाडले. त्यावर आणखी एका अनोळखी व्यक्तीने तो सीबीआय अधिकारी बोलत असल्याचे सांगितले. मनी लॉड्रिंग आणि अपहरणाचे गुन्हे दाखल असून त्यात तुम्हाला अटक करायची आहे. तुमची मालमत्ताही जप्त करायची असल्याचा बनाव चोरट्याने रचला. फिर्यादीस भीती दाखवून अटक आणि इतर कारवाई टाळण्यासाठी त्यांना एका बँक खात्यावर १५ लाख ७४ हजार ६८८ जमा करण्यास भाग पाडले. आरोपींनी ती रक्कम स्वतःच्या फायद्यासाठी वापरून फिर्यादीची फसवणूक केली. वाकड पोलिस अधिक तपास करत आहेत.