‘मागासवर्गीयांचा निधी योग्य कामासाठी वापरावा’

पिंपरी, ता. ९ : महाराष्ट्र सरकारने १४ जुलै २०२४ अद्यादेश काढून अनुसुचित जातीसाठी राखीव निधी ‘मुख्यमंत्री तीर्थ दर्शन योजना’ व इतर महामंडळाकडे वळविला आहे. अनुसूचित जाती व नवबौद्धांसाठी स्थापन करण्यात आलेला निधी हा त्‍यांच्‍यासाठीच वापरावा, अशी मागणी पुणे जिल्‍हा सर्व जाती जमाती कमिटीचे अध्यक्ष दत्तात्रेय सोनवणे यांनी प्रसिद्धीपत्रकाद्वारे केली आहे.
सोनवणे यांनी प्रसिद्धिपत्रकात नमूद केले आहे की, अनुसूचित जातीचा निधी त्‍यांच्‍याच विद्यार्थ्यांवर खर्च होणे अपेक्षित आहे. सरकार काही आडमुठे धोरणे राबवत आहे. त्‍यामुळे विद्यार्थ्याच्या न्याय हक्कावर गदा आणली आहे. राज्यातील अनुसूचित जाती जमाती, मराठा, ओबीसी, भटके, विमुक्त आदी प्रवर्गातील विद्यार्थ्यांना शैक्षणिक संधी व उज्वल भविष्यासाठी बार्टी, सारथी, व महाज्योती या स्वायत्त संस्था स्थापन केलेल्या आहेत. याद्वारेच या संस्थांच्या वतीने विविध शैक्षणिक योजना व रोजगाराच्या संधी उपलब्ध करून दिल्या जातात. सामाजिक न्याय विभागाअंतर्गत असलेल्या मागासवर्गीयांच्या महामंडळावर अद्यापही अध्यक्ष नेमलेला नाही. तो नेमण्यात यावा, अशीही मागणी करण्यात आली.