दरवर्षी बालनाट्य संमेलन व्हावे अभिनेत्री नीलम शिर्के-सामंत यांची अपेक्षा

पिंपरी, ता. ६ : ‘‘दरवर्षी बालनाट्य संमेलन झालेच पाहिजे. अर्थात बालनाट्य हाच खरा पाया आहे. बालनाट्यापासूनच मोठे कलाकार तयार झाले आहेत. नाट्य परिषदेच्या प्रत्येक शाखेने यासाठी पुढाकार घेतला पाहिजे. त्यासाठी हवी ती मदत करण्यास तयार आहे, अशी ग्वाही अभिनेत्री नीलम शिर्के-सामंत यांनी दिली. निमित्त होते शंभराव्या अखिल भारतीय मराठी नाट्य संमेलनाच्या ‘बालनगरी’ रंगमंचाचे उद्घाटनाचे.

चिंचवड-भोईरनगर येथील बालनगरी रंगमंचाचे उद्‍घाटन शिर्के यांच्या हस्ते झाले. याप्रसंगी अभिनेत्री सविता मालपेकर, भाऊसाहेब भोईर, बोक्या सातबंडे नाटकातील बालकलकार आरुष बेडेकर, सिद्धा आंधळे आदी उपस्थित होते.
दरम्यान, गणेश स्तवनाने कार्यक्रमाची सुरवात झाली.
शिर्के म्हणाल्या, ‘‘बालनाट्य हा फक्त रंगमंचावर येऊन केलेले सादरीकरण नसते. त्यामुळे मुलांमध्ये एक आत्मविश्वास येतो. त्यांचा व्यक्तिमत्त्व विकास होतो. मुलांमध्ये एकाग्रताही तेवढीच वाढते.’’

किलबिलाटाने गजबजली बालनगरी
नाट्य संमेलनात प्रथमच लहान मुलांच्या किलबिलाटाने बालनगरी गजबजली. ‘बालनगरी’त स्थानिक बाल कलाकारांच्या ‘गजरा नाट्यछटांचा’ यामधून बालकलाकारांनी विविध छटा सादर केल्या.
‘जॉबलेस जॉय’(क्लाऊन माईम) सादर करण्यात आले. दरम्यान, अनेक शिक्षकांनी विद्यार्थ्यांचा सहभाग असलेल्या भरगच्च सांस्कृतिक कार्यक्रमांची मेजवानी दिली.

‘बोक्या सातबंडे’ला मोठा प्रतिसाद
यावेळी ‘बोक्या सातबंडे’ हे नाटक चांगलेच रंगले. यास बालरसिकांचा मोठा प्रतिसाद मिळाला. भूमिकेतील सहजता आणि बालवयात असलेले रंगभूमीवरील पक्के भान हे नोंद घेण्याजोगे होते.