वेतनवाढ, पदोन्नतीची डॉ. पाटील यांची मागणी

पिंपरी, ता. ३१ : पिंपरी-चिंचवड महापालिकेच्‍या यशवंतराव चव्‍हाण स्‍मृती (वायसीएम) रुग्णालयातील फिजिशियन पदासाठी डॉ. विनायक पाटील यांना प्रतिक्षा आहे. या पदासाठी योग्य अर्हता प्राप्‍त केल्‍या असूनही २०१५ पासून पदोन्‍नती तसेच वेतनवाढ रखडली आहे. या बाबत त्वरित कार्यवाही करून वेतनवाढ आणि पदोन्‍नती देण्याची मागणी त्यांनी आयुक्त शेखर सिंह यांच्याकडे केली आहे.
डॉ. पाटील ‘वायसीएम’मध्ये वैद्यकीय अधिकारी पदावर कार्यरत आहेत. रुग्णालयात फिजिशिअनपदाच्‍या रिक्‍त जागा होत्‍या. त्‍या जागेसाठी पात्र असूनही पदोन्‍नतीसाठी डावलले असल्‍याचे डॉ. पाटील यांनी सांगितले. २०१५ रोजी असणाऱ्या खातेनिहाय चौकशीमुळे वेतनवाढ रोखण्यात आली. त्‍यानंतर न्‍यायालयात खटला प्रलंबित असल्‍याने पदोन्‍नतीचा विषय रखडला होता. खातेनिहाय चौकशीबाबत विलंब करण्यात आला. चौकशीतून काहीही निष्पन्‍न झाले नाही. दरम्यान; डॉ. पाटील यांच्‍यावर न्‍यायालयात सुरू असलेल्‍या विनयभंगाच्या व धमकीच्या खटल्‍यातून त्‍यांची निर्दोष मुक्तता करण्यात आली आहे.