रावेतला उद्या ‘बारावीनंतरचे करिअर’ मार्गदर्शन

पिंपरी, ता. ३० ः तुमचा मुलगा किंवा मुलगी आता दहावी किंवा बारावीला आहे. की दहावी किंवा बारावी उत्तीर्ण झालाय? पुढील शिक्षणाबाबत मार्गदर्शन हवंय, बारावीनंतर होणाऱ्या विविध प्रवेश परीक्षांना सामोरे जायचंय, त्याबाबत मार्गदर्शन हवंय? या सर्वांची उत्तरे तुम्हाला मिळणार आहेत. तेही अगदी मोफत. कारण, रावेत येथील एस. बी. पाटील पब्लिक स्कूलमध्ये ‘सकाळ विद्या’ आणि पिंपरी-चिंचवड कॉलेज ऑफ इंजिनिअरिंग ॲण्ड रिसर्च (पीसीसीओईआर) आपल्यासाठी रविवारी (ता. १) घेऊन आले आहे, ‘बारावीनंतरचे करिअर’ विषयावरील मार्गदर्शन चर्चासत्र.
बारावीनंतरच्या उच्च शिक्षणासाठी अर्थात बीबीए, बीसीए, बी.कॉम व बीए अशा अभ्यासक्रमांसाठी (कोर्सेस) सीईटी (कॉमन एंट्रान्स टेस्ट) अर्थात संयुक्त प्रवेश परीक्षा द्यावी लागत आहे. या प्रवेश प्रक्रियेत झालेल्या बदलांबाबत आणि ‘बारावीनंतरचे करिअर’ या विषयावर मार्गदर्शन केले जाणार आहे. त्यामुळे बारावीच्या विद्यार्थ्यांनी बोर्ड परीक्षेबरोबरच विविध सीईटी परीक्षांना कसे सामोरे जायचे?, या प्रश्नांची उत्तरेही मिळणार आहेत. तेही आपल्या घरापासून जवळ असलेल्या रावेत येथील एस. बी. पाटील पब्लिक स्कूलमध्ये ‘सकाळ विद्या’ व पिंपरी-चिंचवड कॉलेज ऑफ इंजिनिअरिंग ॲण्ड रिसर्च यांच्यातर्फे आयोजित चर्चासत्रामध्ये. रविवारी (ता. १) सकाळी दहा वाजता चर्चासत्राला सुरुवात होईल. त्यात ‘प्लेसमेंटच्या संधी’ या विषयावर डॉ. शीतलकुमार रवंदळे, विवेक वेलणकर, पीसीसीईओई ॲण्ड रिसर्चचे प्राचार्य व वैज्ञानिक डॉ. हरीश तिवारी आणि ‘बारावीनंतरचे करिअर’ या विषयावर बीबीए, बीसीएच्या विभागप्रमुख डॉ. स्मृती पाठक मार्गदर्शन करतील.

बीबीए, बीसीएमधील प्रवेश
बीबीए, बीसीएमधील शिक्षण आणि प्रवेश; राज्य व राष्ट्रीय पातळीवर विविध स्पर्धा परीक्षांची तयारी कशी करावी? पदविका प्रवेशासाठी ‘सीईटी’ परीक्षांचे स्वरूप व अभ्यासक्रम, त्यांची तयारी; ‘आगामी काळात अभ्यासक्रमातील बदल’ या विषयावर चर्चासत्रात मार्गदर्शन मिळणार आहे. व्यवस्थापनशास्त्र पदवी (बीबीए, बीएमएस), संगणक उपयोजन पदवी (बीसीए) अभ्यासक्रमाच्या प्रवेशासाठी घेतलेली सामाईक प्रवेश परीक्षा (सीईटी) घेण्यात आली होती. मात्र, बऱ्याच उमेदवारांना ही परीक्षा देता न आल्याने पुरवणी परीक्षा घेण्यात आली होती. याबरोबरच बीकॉम आणि बीए बाबतही मार्गदर्शन मिळेल.

आता सीईटी बंधनकारक
आतापर्यंत बीबीए, बीसीए या अभ्यासक्रमांची प्रवेश प्रक्रिया महाविद्यालय स्तरावर होत होती. मात्र, अखिल भारतीय तंत्रशिक्षण परिषदेने (एआयसीटीई) हे अभ्यासक्रम स्वतःच्या अखत्यारित घेऊन, या अभ्यासक्रमांसाठी मान्यता बंधनकारक केली. त्यानंतर, या अभ्यासक्रमांच्या प्रवेशासाठी यंदा पहिल्यांदाच सीईटी सेलच्या माध्यमातून ‘सीईटी’ घेण्याचा निर्णय घेण्यात आला. त्यानुसार, सीईटी सेलतर्फे २९ मे रोजी सीईटी घेण्यात आली. मात्र, उपलब्ध जागांच्या तुलनेत सीईटी परीक्षा दिलेल्या विद्यार्थ्यांची संख्या फारच कमी होती. त्यामु‌ळे, राज्यातील महाविद्यालयांत हजारो जागा रिक्त राहण्याची भीती व्यक्त करून संस्थाचालकांनी पुन्हा सीईटी घेण्याची मागणी केली होती. ‘सकाळ विद्या’ या चर्चासत्रातून विद्यार्थी व पालकांच्या करिअर व प्रवेश परीक्षांतील बदलांविषयीच्या सर्व शंका व प्रश्‍नांची उत्तरे मिळतील.

काय? कधी? केव्हा? कुठे?
काय? ः बारावीनंतरचे करिअर
कधी? ः रविवार, १ सप्टेंबर २०२४
केव्हा? ः सकाळी १० वाजता
कुठे? ः एस. बी. पाटील पब्लिक स्कूल, रावेत
प्रवेश ः विद्यार्थी व पालकांसाठी विनामूल्य
वक्ते ः डॉ. शीतलकुमार रवंदळे, विवेक वेलणकर, डॉ. हरीश तिवारी, डॉ. स्मृती पाठक

नाव नोंदणीसाठी संपर्क ः ९७३०९५९६९९, ९३०७७१५९०३
--