बालवाडी शिक्षकांच्या मानधनात १० टक्के वाढ

पिंपरी, ता. ११ ः महापालिका प्राथमिक शिक्षण विभागात काम करणाऱ्या २०४ बालवाडी शिक्षक व सेविका यांना महापालिका प्रशासनाकडून ‘मॉन्सून गिफ्ट’ मिळाले आहे. संबंधित कर्मचाऱ्यांना मानधनामध्ये दहा टक्के वाढ देण्याच्या प्रस्तावास स्थायी समितीमध्ये मंजुरी देण्यात आली. महापालिका शिक्षण विभागाच्या माध्यमातून प्राथमिक शिक्षण विभागात सध्या २०५ बालवाडी कार्यरत आहेत.
या बालवाड्यांमध्ये १९२ शिक्षिका, एक मुख्य समन्वयक, आठ समन्वयक आणि तीन बालवाडी सेविका असे २०५ कर्मचारी मानधन तत्त्वावर काम करीत आहेत. संबंधित कर्मचाऱ्यांची मानधनामध्ये दर दोन वर्षांनी एकवट मानधनाचे दहा टक्के वाढ करण्याबाबत २०२१ मध्ये मान्यता देण्यात आली आहे. सप्टेंबर २०२३ मध्ये या कर्मचाऱ्यांच्या सेवेची दोन वर्षे पूर्ण झाली आहेत. त्यामुळे ऑक्टोबर २०२३ पासून संबंधितांना मानधनामध्ये वाढ करणे अपेक्षित होते. त्याला यश मिळाले असून, महापालिका स्थायी समितीमध्ये संबंधित प्रस्तावाला आयुक्त तथा प्रशासक शेखर सिंह यांनी मंजुरी दिली आहे.

बालवाडी कर्मचाऱ्यांना दिलासा
बालवाडीमध्ये शिकणाऱ्या सर्वसामान्य कुटुंबातील विद्यार्थ्यांना ज्ञानदान करण्याचे कर्तव्य बालवाडी शिक्षिका व सेविका करीत आहेत. दोन वर्षांच्या सेवेनंतर दहा टक्के मानधनामध्ये वाढ करावी, असा निर्णय झाला आहे. पण, २०२३ पासून या निर्णयाची अंमलबजावणी तांत्रिक बाबींमुळे झाली नाही. याबाबत प्रशासनास सूचना केली होती. त्यामुळे २०४ बालवाडी कर्मचाऱ्यांना दिलासा मिळाला आहे.