संतांचे विचार आणि कार्य बहुजनांपर्यंत पोहोचवा ः वाळुंजकर

पिंपरी, ता. २६ : ‘‘संतांचे विचार आणि कार्य हे बहुजन समाजापर्यंत पोहोचविण्यासाठी सर्वांनी एकत्रित प्रयत्न करावे.’’ असे आवाहन माऊली महाराज वाळुंजकर यांनी केले.
संत सेना महाराज यांच्या पुण्यतिथीनिमित्त चिंचवडगाव येथे महाराष्ट्र नाभिक महामंडळ, पुणे जिल्हा कार्यकारिणी व पंचक्रोशीतील भजनी मंडळाच्यावतीने आयोजित कार्यक्रमात वाळुंजकर यांच्या हस्ते संत सेना महाराज यांच्या प्रतिमेचे पूजन करण्यात आले. त्यावेळी ते बोलत होते.
कीर्तनात उमेश महाराज शिंदे म्हणाले, ‘‘कर्म हीच पूजा आहे, असे जरी मानले तरी आपल्याकडून शुद्ध परमार्थ होऊ शकतो, असा संदेश सेना महाराज यांनी तुम्हा आम्हाला दिला आहे.’’ यावेळी दिनेश शितोळे, अरुण ढमाले, विजय गायकवाड, कालिदास गायकवाड, विजय दर्शिले, शांताराम भालेराव, माणच्या सरपंच अर्चना सचिन आढाव, कीर्तनकार नाथा महाराज मोरे, किरण मगर, शांताराम भालेराव आदी उपस्थित होते.
कार्यक्रम यशस्वी करण्यासाठी सुनील वाळुंज, बळीराम मंडलिक, संपत ताटे, गजानन वाशिमकर, प्रभाकर भालेकर, अंकुश जाधव, हेमंत भालेकर आदींनी परिश्रम घेतले. जिल्हाध्यक्ष अशोक मगर यांनी आयोजन केले. कोषाध्यक्ष तानाजी वाळुंजकर यांनी सूत्रसंचालन केले. तर सरचिटणीस तेजस पंडित यांनी आभार मानले.