‘अण्णा भाऊ साठे’ पुरस्काराने ज्येष्ठ साहित्यिकांचा गौरव

पिंपरी, ता. २५ : साहित्यरत्न लोकशाहीर अण्णा भाऊ साठे यांच्या १०५ व्या जयंतीचे औचित्य साधून चिंचवड येथील प्रा. रामकृष्ण मोरे प्रेक्षागृहात ‘द फोक परंपरा’ या सांस्कृतिक कार्यक्रमाचे आयोजन करण्यात आले. यावेळी लोकसाहित्य आणि लोककलांच्या समृद्ध परंपरेचे जतन करणाऱ्या कलाकारांचा गौरव करण्यात आला.
डॉ. बाबासाहेब आंबेडकर संशोधन व प्रशिक्षण संस्था (बार्टी), पिंपरी चिंचवड महानगरपालिका आणि कलारंग सांस्कृतिक संस्था यांच्यावतीने रविवार (ता.२४) हा कार्यक्रम पार पडला. या वेळी साहित्य आणि कला क्षेत्रात उल्लेखनीय कामगिरी करणाऱ्या तुकाराम पाटील, राज अहिरराव, तानाजी एकोंडे, धनंजय भिसे आणि शामला पंडित यांना सन्मानचिन्ह आणि रोख रक्कम देऊन गौरविण्यात आले.
तसेच जर्मनीतील युनायटेड वर्ल्ड कॉलेजमध्ये उच्चशिक्षणासाठी निवड झालेली श्रावणी टोणगे हिचा विशेष सत्कार करण्यात आला. लोककलांच्या ‘फोक परंपरा’ सादरीकरणामुळे प्रेक्षागृहातील वातावरण भारून गेले होते.
या सोहळ्याला खासदार श्रीरंग बारणे, आमदार उमा खापरे, माजी आमदार आश्विनी जगताप आणि भाजप शहराध्यक्ष शत्रुघ्न काटे यांच्यासह अखिल भारतीय मराठी नाट्य परिषदेच्या पिंपरी-चिंचवड शाखेचे अध्यक्ष भाऊसाहेब भोईर यांच्यासह अण्णा भाऊ साठे जयंती उत्सव समितीचे अध्यक्ष बाळासाहेब रसाळ, अनिल सौंदळे आदी उपस्थित होते.