लेझर बीम वापरास मनाईचा आदेश जारी

पिंपरी, ता. २६ : गणेशोत्सव, नवरात्रोत्सव, ईद ए मिलाद तसेच इतर सण-उत्सवात लेझर बीम लाईटचा वापर करण्यास मनाई करण्यात आली आहे. याबाबत पिंपरी-चिंचवडचे पोलिस आयुक्त विनयकुमार चौबे यांनी आदेश जारी केले. विविध कार्यक्रमांमध्ये तसेच मिरवणूकांत लेझर बीमचा वापर करण्यात येतो. मागील वर्षी मिरवणुकीत लेझर बीमचा मोठ्या प्रमाणात वापर झाला होता. लेझर बीममुळे डोळ्यांना इजा होण्याची दाट शक्यता असते. या पार्श्वभूमीवर पिंपरी-चिंचवड पोलिसांनी हा आदेश जारी केला आहे. लेझर बीम लाईटचा वापर करणाऱ्या मंडळांवर पोलिसांची नजर राहणार आहे. लेझर बीमचा वापर केल्यास संबंधितांवर कडक कारवाई करण्यात येईल, असा इशारा पोलिस आयुक्त चौबे यांनी दिला आहे.
-----------------------