पवनमावळात जल्लोषात गणरायाचे स्वागत

सोमाटणे, ता.२७ ः पवनमावळ पूर्व भागात ढोल, ताशा, झांज, लेझीम आणि ‘गणपती बाप्पा मोरया’च्या जयघोषाने गणरायाचे आगमन झाले.
पवनमावळातील सोमाटणे, साळुंब्रे, गहुंजे, दारुंब्रे, गोडुंब्रे, सांगवडे, चांदखेड, आढले, कुसगाव, शिरगाव, पाचाणे या गावात प्रमुख गणेश मंडळ आहेत. या गावातील गणेश भक्तांनी गणेशमूर्तीच्या प्राणप्रतिष्ठापनेनिमित्त बुधवारी सायंकाळी भंडारा उधळत रंगीबेरंगी विद्युत रोषणाई केलेल्या रथातून मिरवणुका काढल्या. मिरवणुकीत गावातील गणेश भक्त उत्साहाने सहभागी झाले होते. रात्री सात वाजण्याच्या सुमारास विविध धार्मिक कार्यक्रमांनी गणेश मूर्तीची प्राणप्रतिष्ठापना करण्यात आली. सोमाटणे व चांदखेड येथे सात दिवसाचा तर उर्वरित गावात दहा दिवसाचा गणेश उत्सव साजरा केला जाणार आहे. त्यामुळे मंडळांनी चार दिवसापूर्वीच सजावटीचे काम पूर्ण केले होते. यावर्षी धार्मिक, सामाजिक उपक्रमाबरोबरच शालेय विद्यार्थी तसेच महिलांसाठी विविध स्पर्धांचे आयोजन गणेश मंडळांनी केले आहे.