गणेश मूर्ती मातीच्या पुनर्वापरासाठी ‘पुनरावर्तन’ मोहीम

पुणे, ता. २८ : गणेश मूर्तीचे विसर्जन झाल्यानंतर माती, शाडूची माती गोळा करून त्याचा पुनर्वापर करण्याच्या उद्देशाने ‘इकोएक्झिस्ट फाउंडेशन’तर्फे दरवर्षी ‘पुनरावर्तन’ या मोहिमेचे आयोजन केले जाते. यंदा या मोहिमेचे सहावे वर्ष असून यात सहभागी होण्याचे आवाहन फाउंडेशनने केले आहे.

गणेशोत्सवादरम्यान विसर्जनानंतर माती गोळा करणे आणि त्याचा पुनर्वापर करणे, या उद्देशातून या मोहिमेंतर्गत भाविकांना घरगुती पद्धतीने विसर्जन करण्यासाठी आणि माती गोळा करून कारागिरांना परत वापरण्यासाठी देण्यास प्रोत्साहित केले जाते. गतवर्षी या मोहिमेत सुमारे ५७ हजार किलो माती संकलित करण्यात आली होती. यंदा १०० टन माती गोळा करण्याचे उद्दिष्ट आहे.
यासाठी पिंपरी-चिंचवडमध्ये २६ संकलन केंद्र तयार करण्यात आली आहेत. या केंद्रांवर १४ सप्टेंबरला सकाळी १० ते दुपारी एक या वेळेत फाउंडेशनचे स्वयंसेवक माती स्वीकारणार आहेत. पिंपरी-चिंचवड महापालिकेनेही या मोहिमेला प्रोत्साहन दिले आहे. संकलन केंद्राची सविस्तर माहिती सोबतचा ‘क्यूआर कोड’ स्कॅन केल्यावर मिळणार आहे.

पूर्णम इकोव्हिजन, स्वच्छ कूप, जीवित नदी, पुणे क्लायमेट वॉरिअर्स, बावधन सिटिझन्स फोरम, टीम स्वच्छ कल्याणीनगर, फर्ग्युसन महाविद्यालय, कमिन्स फाउंडेशन, रेडिओ बिग एफएम, पर्यावरण गतिविधी, श्रीमंत भाऊसाहेब रंगारी ट्रस्ट, रोटरॅक्ट क्लब ऑफ व्हायब्रंट्स आदी संस्थांसह ३२ गणेश मंडळे या मोहिमेत सहभागी होत आहेत. महाराष्ट्र प्रदूषण नियंत्रण मंडळ आणि ‘माझी वसुंधरा’ अभियानाने ही मोहीम ४३ शहरांमध्ये राबविण्याचेही निर्देश दिले आहेत. अधिकाधिक नागरिकांनी या मोहिमेत सहभागी व्हावे, असे आवाहन संयोजकांनी केले आहे.