सासरच्या छळाला कंटाळून विवाहितेची आत्महत्या

पिंपरी, ता. २८ : पिंपरीतील एका विवाहितेने माहेरहून पैसे आणण्यासाठी सासरकडून होणाऱ्या छळाला कंटाळून गळफास घेऊन आत्महत्या केली. ही घटना अजमेरा येथील चैताली हौसिंग सोसायटी येथे घडली.
माधवी पाटील असे आत्महत्या केलेल्या विवाहितेचे नाव आहे. या प्रकरणी माधवी यांची आई वंदना जोरी (रा. नेहरूनगर, पिंपरी) यांनी संत तुकारामनगर पोलिस ठाण्यात फिर्याद दिली आहे. त्यानुसार पोलिसांनी आरोपी पती महेश पाटील (वय ३६, रा. चैताली हौसिंग सोसायटी, अजमेरा, पिंपरी) तसेच नणंद व पतीची मानलेली बहीण यांना अटक केली आहे. फिर्यादी यांची मुलगी माधवी आणि आरोपी महेश यांचा दोन वर्षापूर्वी विवाह झाला होता. महेश याचा हॉटेल व्यवसाय असून त्याच्या व्यवसायासाठी वारंवार माहेरहून पैसे आणण्यास सांगितले. या त्रासामुळे माधवी यांनी बुधवारी राहत्या घरी साडीच्या साहाय्याने गळफास घेऊन आत्महत्या केली. या प्रकरणी पोलिसांनी हुंडाबळी तसेच आत्महत्येस प्रवृत्त करणे या कलमांतर्गत गुन्हा दाखल आहे.