नवीन थेरगाव रुग्णालयात युरॉलॉजी शस्त्रक्रिया यशस्वी

पिंपरी, ता. २९ ः महापालिकेच्या नवीन थेरगाव रुग्णालयात युरॉलॉजीची पहिली मोठी शस्त्रक्रिया यशस्वीरीत्या पार पडली. ६४ वर्षांच्या एका व्यक्तीच्या प्रकृतीत गुंतागुंत असूनही पालिकेच्या डॉक्टरांनी सहकाऱ्यांच्या साथीत हे आव्हान पेलले.
या व्यक्तीच्या मूत्रपिंडात गाठी निर्माण झाल्या होत्या. मधुमेहजन्य आम्लता (डायबेटिक केटोअ‍ॅसिडोसिस), हृदयाच्या स्नायूंची वाढ (लेफ्ट व्हेंट्रिक्युलर हायपरट्रॉफी) व डायस्टॉलिक डिसफंक्शन अशी गुंतागुंतही होती. शस्त्रक्रियेपूर्वी रुग्णाची प्रकृती स्थिर ठेवण्यासाठी अ‍ॅनेस्थेशिया व मेडिसिन विभागाने समन्वय साधून तयारी केली. जनरल अ‍ॅनेस्थेशिया देण्याची जबाबदारी डॉ. अर्चना गांधी, डॉ. पूजा कुलकर्णी, डॉ. पूनम माने व डॉ. अर्जित रेपुरिया यांनी सांभाळली. शस्त्रक्रियेच्या वेळी रुग्णाच्या रक्तातील साखरेचे प्रमाण, श्वसन-रक्ताभिसरण संतुलन आणि शस्त्रक्रियेतील स्थिती यांचा विचार करून काटेकोर व्यवस्थापन करण्यात आले. युरोसर्जन डॉ. सुनील पालवे आणि डॉ. हनुमंत फड यांनी कौशल्यपूर्णरीत्या शस्त्रक्रिया पूर्ण केली. त्यामुळे मूत्रपिंडाला लागून असलेली १० बाय १० सेंटीमीटर आकाराची गाठ काढता आली.
आरोग्य वैद्यकीय अधिकारी डॉ. लक्ष्मण गोफणे यांच्या मार्गदर्शनाखाली व अतिरिक्त आरोग्य वैद्यकीय अधिकारी डॉ. अभयचंद्र दादेवार यांच्या नेतृत्वात रुग्णालय प्रमुख डॉ. राजेंद्र फिरके व डॉ. संजय सोनेकर यांच्यासह ऑपरेशन थिएटर तंत्रज्ञ व परिचारिकांचे योगदान यात मोलाचे ठरले.
---
नवीन थेरगाव रुग्णालयात युरॉलॉजी विभागातील पहिली मोठी शस्त्रक्रिया यशस्वी होणे ही महापालिका वैद्यकीय विभागासाठी अभिमानाची बाब आहे. महापालिकेच्या रुग्णालयांमध्ये अत्याधुनिक वैद्यकीय सुविधा उपलब्ध करून देण्यासाठी आमचे प्रयत्न सातत्याने सुरू आहेत. त्यामुळे नागरिकांना उत्तम उपचार सेवा स्थानिक पातळीवर मिळण्यास मदत होत आहे.
- विजयकुमार खोराटे, अतिरिक्त आयुक्त, महापालिका
---
युरॉलॉजी विभागात झालेल्या शस्त्रक्रियेत अ‍ॅनेस्थेशिया, मेडिसिन, युरॉलॉजी तसेच नर्सिंग अशा सर्व विभागांनी एकत्रितपणे काम करून उत्कृष्ट समन्वय साधला. त्यामुळेच ही शस्त्रक्रिया यशस्वीरीत्या पूर्ण करणे शक्य झाले झाले.
- डॉ. लक्ष्मण गोफणे, आरोग्य वैद्यकीय अधिकारी, महापालिका
-------