विसर्जन घाटांवर वैद्यकीय पथक, रुग्णवाहिका सज्ज

पिंपरी, ता. १ ः शहरातील घरगुती व सार्वजनिक गणपतींचे विसर्जन सुरळीत, सुरक्षितरित्या पार पडावे यासाठी महापालिकेकडून विशेष नियोजन करण्यात आले आहे. यासाठी महापालिकेच्या वतीने शहरातील महत्त्वाच्या विसर्जन घाटांवर वैद्यकीय पथकांसह सुसज्ज रुग्णवाहिकांची व्यवस्था करण्यात आली आहे. या पथकांमध्ये वैद्यकीय अधिकारी, स्टाफ नर्स, वॉर्डबॉय, रुग्णवाहिका चालक व सफाई कर्मचारी यांचा समावेश आहे. या पथकांना मुबलक औषधसाठा, आवश्यक वैद्यकीय साहित्य व सुसज्ज रुग्णवाहिका उपलब्ध करून देण्यात आल्या आहेत.

या विसर्जन घाटांवर वैद्यकीय पथक
- प्राधिकरण तळे, गणेश तलाव (अ प्रभाग)
- वाल्हेकरवाडी जाधव घाट (ब प्रभाग)
- काळेवाडी स्मशान घाट (ब प्रभाग)
- सुभाषनगर घाट, पिंपरी (ब प्रभाग)
- वाकड गावठाण घाट (ड प्रभाग)
- मोशी नदी घाट (इ प्रभाग)
- चिखली स्मशान घाट (फ प्रभाग)
- केजुदेवी बंधारा घाट (ग प्रभाग)
- सांगवी घाट (ह प्रभाग)
- पिंपळे गुरव घाट (ह प्रभाग)

‘‘गणेशोत्सवाच्या काळात नागरिकांची सुरक्षितता हीच आमची प्राथमिकता आहे. विसर्जन घाटांवर तैनात केलेली वैद्यकीय पथके आणि रुग्णवाहिका ही त्याचाच एक भाग आहे. गणेशोत्सव हा सुरक्षित व निर्विघ्न पार पडावा, यासाठी महापालिका प्रयत्नशील आहे.’’
- शेखर सिंह, आयुक्त, पिंपरी-चिंचवड महापालिका

‘‘गणेशोत्सवादरम्यान गर्दीच्या ठिकाणी आरोग्यविषयक अडचणी निर्माण होऊ नयेत, यासाठी वैद्यकीय विभाग सतर्क आहे. आपत्कालीन सेवा, आरोग्य तपासणी केंद्रे व औषधोपचार यंत्रणा सज्ज ठेवण्यात आली आहे. नागरिकांच्या आरोग्य सुरक्षेला प्राधान्य देत महापालिका सातत्याने लक्ष ठेवून आहे.
- विजयकुमार खोराटे, अतिरिक्त आयुक्त, पिंपरी-चिंचवड महापालिका
---