ओबीसी विद्यार्थ्यांसाठी वसतिगृहात प्रवेश प्रक्रिया सुरू

पिंपरी, ता. १ : इतर मागास बहुजन कल्याण विभागाने (ओबीसी) वसतिगृह प्रवेश प्रक्रिया सुरू केली आहे. यासाठी इतर मागासवर्ग, विमुक्त जाती, भटक्या जमाती, विशेष मागास प्रवर्गातील विद्यार्थी शासकीय वसतिगृह प्रवेशासाठी ऑनलाइन पद्धतीने अर्ज करू शकतात. तसेच ज्या विद्यार्थ्यांना वसतिगृह प्रवेश मिळू शकत नाही, अशांसाठी पंडित दीनदयाल उपाध्याय स्वयम् योजना व ज्ञानज्योती सावित्रीबाई फुले आधार योजनेसाठी अर्ज मागविण्याचे वेळापत्रक याप्रमाणे निश्चित झाले आहे.
इच्छुक अर्जदारांनी इतर मागास बहुजन कल्याण विभागाने दिलेल्या https://hmas.mahait.org अधिकृत संकेतस्थळावर जाऊन अर्ज करावयाचा आहे. त्यासाठी बारावीनंतर व्यावसायिक अभ्यासक्रमास प्रवेश घेतलेल्या पदवी व पदव्युत्तर अभ्यासक्रमास प्रवेश घेतलेल्या विद्यार्थ्यांनी एक ते १८ सप्टेंबर या कालावधीत अर्ज करावा. त्यानंतर १९ ते २४ सप्टेंबर या कालावधीत अर्ज छाननी केली जाणार आहे; तर २५ सप्टेंबर रोजी पहिली निवड यादी प्रसिद्ध केली जाणार आहे.
या यादीद्वारे निवड झालेल्या विद्यार्थ्यांना ६ ऑक्टोबरपर्यंत आपला प्रवेश निश्चित करणे आवश्यक आहे. त्यानंतर नऊ ऑक्टोबर रोजी रिक्त जागेवर प्रवेशासाठी दुसरी यादी प्रसिद्ध होईल. दुसऱ्या निवड यादीतील प्रवेशासाठी १७ ऑक्टोबर ही अंतिम मुदत असल्याचे इतर मागास बहुजन कल्याण विकास विभागाकडून सांगण्यात आले आहे.