प्रारूप प्रभाग रचनेवर २२ ऑगस्टला सुनावणी

पिंपरी, ता. ८ : पिंपरी-चिंचवड महानगरपालिकेच्या प्रारुप प्रभाग रचनेबाबत नागरिकांनी केलेल्या हरकती व सूचना सादर केल्या. त्यावर २२ ऑगस्ट सुनावणीचे ऑटो क्लस्टर येथे आयोजन करण्यात आले आहे. सहकार व पणन विभाग प्रधान सचिव प्रवीण दराडे यांच्यासमोर सुनावणी होणार आहे.
पिंपरी चिंचवड महापालिकेच्या प्रारुप प्रभाग रचनेबाबत एकूण ३१८ हरकती प्रशासनाकडे आल्या आहेत. हरकती व सूचना दाखल केल्या, त्यांनी नियोजित वेळापत्रकानुसार हजर रहावे, असे आवाहन महापालिका प्रशासनाने केले आहे. या संदर्भातील वेळापत्रक महापालिकेच्या संकेतस्थळावर www.pcmcindia.gov.in प्रसिद्ध करण्यात आले आहे. सुनावणीसाठी नागरिकांनी आवश्यक कागदपत्रांसह स्वतः उपस्थित राहावे. हरकतीनुसार नोटीसची प्रत व ओळखपत्र घेऊन येणे अनिवार्य आहे. सुनावणीदरम्यान सर्व नोंदवलेल्या हरकती व सूचना विचारात घेऊन त्यावर कार्यवाही केली जाणार आहे. त्यामुळे नागरिकांनी वेळेत उपस्थित राहून आपली मते मांडावीत, असे आवाहन आयुक्‍त शेखर सिंह यांनी केले आहे.