श्री गुरुदत्त सेवा मंडळाचा वर्धापनदिन उत्साहात

पिंपरी,ता. ९ ः संभाजीनगर येथील श्री दत्त मंदिराचा पंचविसावा वर्धापन दिन उत्साहात साजरा करण्यात आला. या निमित्ताने तीन दिवस मंदिरामध्ये अभिषेक, भजन, कीर्तन, प्रवचन, हरिपाठ अशा विविध धार्मिक कार्यक्रमांचे आयोजन करण्यात आले होते. पहिल्या दिवशी भजनी मंडळांच्या सादरीकरणाचा कार्यक्रम घेण्यात आला. दिवसभर आयोजित करण्यात आलेल्या या कार्यक्रमात शहरातील २० महिला भजनी मंडळांनी सहभाग घेतला होता. या दिवशी सायंकाळी शिवलीला पाटील यांचे कीर्तन झाले. दुसऱ्या दिवशी सकाळी मिरवणूक काढण्यात आली. यामध्ये लेझीम पथके, बॅण्ड पथके सहभागी झाली होती. त्यानंतर मंदिरामध्ये प्रवचन, होमहवन आदी कार्यक्रम झाले. सायंकाळी रोहिणीताई माने - परांजपे यांचे कीर्तन झाले. शेवटच्या दिवशी सत्यनारायण पूजा करण्यात आली. साध्वी वैष्णवी दीदी सरस्वती यांचा सत्संग झाला. या तीन दिवसीय कार्यक्रमांना भाविकांनी मोठ्या प्रमाणावर उपस्थिती लावली. आलेल्या भाविकांसाठी महाप्रसादाचे आयोजन करण्यात आले होते. या वर्धापनदिन सोहळ्याचे आयोजन श्‍याम मोरे, दीपक पालांडे, चंद्रकांत अर्डक यांनी केले.