दुर्गा ब्रिगेडमार्फत उद्योग गटाची घोषणा

पिंपरी, ता. २९ ः दुर्गा ब्रिगेड संघटना महाराष्ट्र राज्य यांच्या वतीने ‘दुर्गा ब्रिगेड उद्योग गट’ स्थापन करण्याची अधिकृत घोषणा करण्यात आली. चिखली घरकुल, शिवतीर्थ चौक येथे नुकत्याच झालेल्या उद्योग व रोजगार बैठकीत ही घोषणा करण्यात आली. ‘महिलांनी फक्त शिलाई मशीनपुरते मर्यादित न राहता सीएनसीसारखी अत्याधुनिक यंत्रेही आत्मसात करावीत व स्वतःचे उद्योग उभारावेत. शासनाच्या विविध योजना महिलांपर्यंत पोहोचवण्यासाठी दुर्गा ब्रिगेड सक्षम असून, महिलांना प्रशिक्षण, मार्गदर्शन आणि उद्योगासाठी आवश्यक सहकार्य दिले जाईल, असे दुर्गा भोर यांनी सांगितले. या उपक्रमाच्या माध्यमातून प्रत्येक प्रभागात महिलांकडून चालवले जाणारे छोटे-मोठे लघुउद्योग एकत्र आणण्याचा संकल्प करण्यात आला. पिंपरी चिंचवड शहर विकास आघाडीचे अध्यक्ष अभय भोर, जयश्री साळुंखे, लघुउद्योजक स्वाती दुबळे, माही शेख यांनीही महिलांना मार्गदर्शन केले. रमा बनसोडे यांनी आभार मानले.