पालिका निवडणूकीचे काउंटडाऊन सुरू

पिंपरी, ता. ५ ः पिंपरी-चिंचवड महापालिकेच्या आगामी निवडणुकीसाठी प्रारूप प्रभाग रचनेचे काम पूर्ण झाले आहे. त्याचा आराखडा महापालिकेच्या निवडणूक विभागाने मंगळवारी (ता. ५) राज्याच्या नगरविकास विभागाला सादर केला.
याची तपासणी झाल्यानंतर नागरिकांच्या हरकती व सूचनांसाठी २२ ऑगस्ट रोजी प्रारूप प्रभाग रचना जाहीर केली जाईल. महापालिकेची निवडणूक २०१७ मध्ये झाली होती. त्याची मुदत १३ मार्च २०२२ रोजी संपली. कोरोना प्रतिबंधक नियम, राज्यातील बदलत्या घडामोडी आणि इतर मागासवर्गीय (ओबीसी) आरक्षणाचे न्यायप्रविष्ट प्रकरण अशा कारणांमुळे निवडणूक होऊ शकली नाही. परिणामी १४ मार्च २०२२ प्रशासक कारभार पाहात आहेत.
सर्वोच्च न्यायालयाने निवडणुका घेण्याचा आदेश एप्रिलमध्ये दिला. त्यानंतर चार सदस्यीय प्रभाग रचनेप्रमाणे निवडणूक घेण्याचा निर्णय राज्य सरकारने घेतला आहे. त्यानुसार प्रभाग रचना तयार करण्याचा आदेश राज्य निवडणूक आयोगाने महापालिकेच्या निवडणूक विभागाला दिला होता.
नियोजित वेळापत्रकानुसार निवडणूक विभागाने प्रारूप प्रभाग रचनेचा आराखडा सादर केला. तो कसा असेल, याची उत्सुकता इच्छुकांना आहे. प्रभाग रचना २०१७ प्रमाणेच झाली आहे. वाढत्या लोकसंख्येमुळे आरक्षणांमध्ये फेरबदल होणार असल्याचे निवडणूक विभागातील सूत्रांनी सांगितले.
---
जागा अशा
निवडणूक ओबीसी आरक्षणासह घेण्याचा मार्ग मोकळा झाल्याने राखीव तसेच एकूणच जागांचे चित्र स्पष्ट झाले आहे.
२० ः अनुसूचित जातीसाठी (एससी)
३ ः अनुसूचित जमाती (एसटी)
३५ ः इतर मागास प्रवर्ग (ओबीसी)
७० ः सर्वसाधारण (खुला) प्रवर्ग
६४ ः महिला
६४ ः पुरुष
---

दृष्टिक्षेपात
- २०१७ ची निवडणूक चार सदस्यीय पद्धतीने
- आगामी निवडणूकही चार सदस्यीय प्रभाग पद्धतीनेच
- प्रारूप प्रभाग रचनेसाठी २०११ ची १७ लाख २९ हजार ३५९ लोकसंख्या प्रमाण
- शहराच्या उत्तरेकडील तळवडे-चिखली भागातून प्रभाग रचना सुरू होणार
- पूर्वेकडे गणना होऊन चऱ्होलीतून दक्षिणेकडे दिघी व तेथून पश्चिमेकडे गणना
- दक्षिणेकडील गावांत सांगवी-दापोडी भाग शेवटच्या प्रभागांत
---
आकडे बोलतात...
- एका प्रभागात मतदार ः ४९ ते ५९ हजार
- एकूण निवडणूक प्रभाग ः ३२
- नगरसदस्यांची संख्या ः १२८
- पन्नास टक्के आरक्षणानुसार महिला सदस्य संख्या किमान ः ६४
---
आरक्षणनिहाय सदस्य
प्रवर्ग / पुरुष / महिला / एकूण
अनुसूचित जाती / १० / १० / २०
अनुसूचित जमाती / १ / २ / ३
इतर मागासवर्ग (ओबीसी) / १७ / १८ / ३५
सर्वसाधारण महिला (खुला) / ... / ३५ / ३५
एकूण आरक्षित जागा / २८ / ६५ / ९३
(खुल्‍या ३५ जागांवर अनुसूचित जाती, अनुसूचित जमाती, ओबीसी संवर्गातील पुरुष व महिला आणि सर्वसाधारण गटातील महिलाही निवडणूक लढवू शकतील. संवर्गासाठीच्या आरक्षित जागा लोकसंख्येच्या प्रमाणानुसार निश्चित केल्या जातात.)
---
प्रारूप प्रभाग रचना २२ ऑगस्टला
प्रारूप प्रभाग रचनेच्या आराखड्याची नगरविकास विभागाकडून तपासणी होईल. त्यांतील त्रुटींचे निरसन करून नगरविकास विभाग राज्य निवडणूक आयोगाला प्रभाग रचनेचा आराखडा सादर करणार आणि आयोगाच्या मान्यतेने २२ ऑगस्ट रोजी महापालिका आयुक्त
प्रारूप प्रभाग रचना प्रसिद्ध करतील. २८ ऑगस्टपर्यंत त्यांवर नागरिकांकडून हरकती व सूचना मागविण्यात येतील. त्यावर सुनावणी होऊन नियोजित वेळापत्रकानुसार अंतिम प्रभाग रचना जाहीर होईल, असे महापालिका निवडणूक विभाग सहायक आयुक्त अविनाश शिंदे यांनी सांगितले.
---