दुकान फोडून सिगारेट चोरणाऱ्या गुन्हेगाराला अटक; पाच गुन्हे उघडकीस

पिंपरी, ता. ५ : दुकान फोडून सिगारेट चोरणाऱ्या सराईत गुन्हेगाराला पिंपरी-चिंचवड पोलिसांच्या गुन्हे शाखा युनिट तीनच्या पथकाने अटक केली. या आरोपीकडून पाच गुन्हे उघडकीस आले असून, मुद्देमालही जप्त केला आहे.
महावीर कुमावत (वय ३८, रा. मीरा रोड, ईस्ट मुंबई) असे अटक केलेल्या आरोपीचे नाव आहे. चाकण, दिघी, बावधन, हिंजवडी परिसरात घडलेल्या दुकानफोडी गुन्ह्यांचा समांतर तपास करीत असताना सीसीटीव्ही फुटेजच्या आधारे या गुन्ह्यातील आरोपी कुमावत याला पोलिसांनी तळेगाव दाभाडे येथून ताब्यात घेतले. त्याच्या मोटारीत दाखल गुन्ह्यातील सिगारेट मुद्देमाल आढळला. आरोपीने त्याचे साथीदार राजेश कदम (रा. भांब्रेकरनगर, कांदिवली मुंबई), ओमसिंग, महिंद्रा मेघवाल (रा. काशीमीरा, मीरा भाईंदर) यांच्यासह मिळून चाकण, दिघी, बावधन, हिंजवडी व ठाणे शहर हद्दीतील राबोडी पोलिस ठाणे येथे गुन्हे केल्याचे निष्पन्न झाले. या आरोपींवर २०१७ पासून सिगारेट चोरीचे एकूण १३ गुन्हे तर फरारी आरोपी राजेश कदम याच्यावर २०१२ पासून सिगारेट चोरीचे २४ गुन्हे दाखल आहेत.