रेडझोन बाधित मिळकतींच्या सामान्य करात ५० टक्के सवलत

पिंपरी, ता. ५ ः संरक्षण विभागाच्या देहूरोड आणि दिघीतील आस्थापनांमुळे तळवडे, चिखली, निगडी, दिघी, भोसरी आदी भागात रेडझोन आहे. त्यामुळे सुमारे ५० हजार मिळकती बाधित होत आहेत. त्यांना महापालिका करआकारणी व करसंकलन विभागाने दिलासा दिला आहे. कारण, बाधित मिळकतींच्या सामान्य करात ५० टक्के सवलत देण्याचा प्रस्ताव ठेवला होता. महापालिकेच्या सर्वसाधारण सभेत मंगळवारी आयुक्त शेखर सिंह यांनी त्याला मंजुरी दिली. त्यामुळे २०२६-२७ च्या मिळकतकरात नागरिकांना सवलतीचा लाभ मिळणार आहे. मात्र, त्यांना थकबाकीची संपूर्ण रक्कम भरावी लागणार आहे.
महापालिकेने मिळकतकर (घरपट्टी) आकारणीसाठी शहरातील मिळकतींची ‘अ’, ‘ब’ व ‘क’ अशी वर्गवारी केली आहे. संबंधित भागातील वार्षिक भाडे दरावरून कर निश्चित केला आहे. त्यानुसार रेडझोन बाधित परिसरात भाडे दर अत्यंत कमी आहे. मात्र, त्याचा समावेश विकसित भागाप्रमाणे ‘क’ वर्गामध्ये केला आहे. त्यामुळे करसवलतीची मागणी नागरिकांनी केली होती. त्यासाठी नगरसेवक पंकज भालेकर यांनी २७ मे २०२४ रोजी आयुक्तांना पत्र पाठवून उपमुख्यमंत्री अजित पवार यांच्याकडे मागणी केली होती. आता २५ जून रोजी अजित पवार यांनी आयुक्तांसमवेत बैठक घेऊन सवलतीबाबत योग्य कार्यवाहीचा आदेश दिला होता. त्यानुसार आयुक्तांनी रेड झोनमधील सर्व मिळकतींना मालमत्ता कराच्या सामान्य करात ५० टक्के सवलतीचा निर्णय मंगळवारी सर्वसाधारण सभेत घेतला. यामुळे नागरिकांना मोठा दिलासा मिळणार आहे.
---