महापालिका स्थायी समिती सभा

वैद्यकीयदृष्ट्या आणखी सक्षम होणार

पिंपरीः वैद्यकीय सुविधा अधिक सक्षम करण्यासाठी महापालिका रुग्णालयांच्या अतिदक्षता विभागातील (इंटेन्सिव्हिस्ट) डॉक्टरांची रिक्त पदे भरण्यात येणार आहेत. तसेच, रुग्णालयात कार्डियाक डोल्पर किंवा २-डी युको व थेडमिल टेस्ट सेवा उपलब्ध करून दिल्या जातील, यासह विविध विकासकामांना महापालिका आयुक्त शेखर सिंह यांनी सर्वसाधारण व स्थायी समिती सभेत मान्यता दिली.
महापालिकेतील दिवंगत महापौर मधुकर पवळे सभागृहात स्थायी समितीची बैठक झाली. अध्यक्षस्थानी आयुक्त तथा प्रशासक सिंह होते. शहरात सुरू असलेल्या विकासकामांचा आढावाही त्यांनी घेतला. रुग्णालयांच्या अतिदक्षता विभागातील पदे ११ महिन्याच्या कालावधीसाठी कंत्राटी पद्धतीने भरण्यात येणार आहेत. त्यासह जलनि:सारण नलिकांची साफसफाई, शंभू सृष्टी उभारणे, कॉन्फेरंन्स ट्रेनिंग अर्बन सस्टेनेबल मोबिलिटी नियोजन करणे, डुडुळगाव प्रधानमंत्री आवास योजनेअंतर्गत आर्थिक दुर्लभ घटकांसाठी निवासी गाळे बांधून अंतर्गत कामे करणे, २०७ बालवाड्यांमधील विद्यार्थ्यांना सकस आहार पुरवठा करण्यासाठी अन्नामृत फाउंडेशनला दोन महिने मुदतवाढ देणे, पिंपरी चौकालगत माता रमाई पुतळा उभारण्यासाठी वास्तुविशारद नेमणे, नव्या रस्त्यांवरील दुभाजकांत पोयटा माती पसरविणे, उद्याने व रुग्णालय इमारतींची दुरुस्ती करणे, क्रीडा संकुलात सीसीटीव्ही यंत्रणा दुरुस्ती, अग्निशमन व माध्यमिक विभागाकरिता डेटा एन्ट्री ऑपरेटर नियुक्त करणे, भामा-आसखेड पाणीपुरवठा जलवाहिनीअंतर्गत कामे, काळा खडक विद्युत विषयक कामे, विद्यालयांतील विविध परीक्षेसाठी साहित्य छपाई, विद्यार्थ्यांसाठी शालेय पिशवी खर्च आदी विषयांना मान्यता दिली.

उल्लेखनीय निर्णय...
- कंपन्या, कारखाने, व्यवसाय अग्निसुरक्षापूर्तता प्रमाणपत्राचे सेवाशुल्क निश्चित करणे
- महापालिका आवारातील उपहारगृहाची जागा पाच वर्षाकरिता भाडेतत्त्वावर देणे
- रावेत प्रधानमंत्री आवास योजनेअंतर्गत प्रकल्प ठेकेदाराकडून ॲडव्हान्सची मूळ रक्कम वसूल करणे
- जगतगुरू संत तुकाराम महाराज संतपीठाच्या संगीत विभागास प्रतिवर्षी २५ लाख रुपये रक्कम देणे
- टाकाऊ वस्तूंपासून टिकाऊ कलाकृतींच्या नियोजित बॉलिवूड पार्कचे स्थळ बदलणे
- महापालिकेच्या भंगार साहित्यांची विक्री लिलाव समितीच्या निर्णयानुसार ई लिलाव करण्यास मान्यता देणे