हिंजवडीत पर्यायी रस्त्यांसाठी भूसंपादन

पिंपरी, ता. ७ : हिंजवडीतील वाहतूक कोंडी व खराब रस्ते आणि पायाभूत सुविधांच्या समस्या कोंडी सोडवण्याच्या दृष्टीने ‘पीएमआरडीए’ या भागांत विविध रस्त्यांची आखणी करत आहे. या रस्त्यांसाठी सध्या संबंधित भागात सर्वेक्षण सुरू आहे. तसेच नवीन रस्ते विकसित करण्यासाठी आवश्यक जमिनीचे भूसंपादन प्रक्रिया राबविण्याच्या अनुषंगाने पुणे महानगर प्रदेश विकास प्राधिकरणाचे आयुक्त डॉ. योगेश म्हसे यांनी हिंजवडी भागातील शेतकऱ्यांसोबत बैठक घेतली.

‘‘हिंजवडीतील नवीन रस्त्यांसाठी भूसंपादन प्रक्रिया ही शेतकऱ्यांशी संवाद आणि समन्वय ठेवूनच राबविण्यात येईल, कुठल्याही शेतकऱ्याचे नुकसान होणार नाही,’’ असे म्हसे यांनी यावेळी सांगितले. तसेच शेतकऱ्यांचे हक्क आणि अधिकारांचा प्रथम विचार करून भूसंपादन प्रक्रिया राबवली जाणार आहे. शेतकऱ्यांनी भूसंपादनास संमती दिली तर त्यांना २५ टक्के अधिकचा मोबदला शासनाकडून मिळणार असल्याचे यावेळी त्यांनी स्पष्ट केले. या प्रस्तावित नवीन रस्त्यांच्या आखणीमुळे हिंजवडीसह परिसरातील वाहतूक कोंडी सुटण्याची अपेक्षा आहे.

प्रस्तावित रस्त्याच्या आखणीसंदर्भात भूसंपादन प्रक्रिया राबवताना थेट खरेदी, संमतीने खरेदी, टीडीआर आणि इन्सेटिव्ह एफएसआय आदीबाबत शेतकऱ्यांना पीएमआरडीएचे महानगर आयुक्त डॉ. म्हसे मार्गदर्शन केले. प्रस्तावित रस्त्याची भूसंपादनाची प्रक्रिया आणि मोबदल्याची माहिती शेतकऱ्यांना देण्यात आली. यासह शेतकऱ्यांशी संवाद साधत त्यांच्या अडचणी समजून घेत त्यांच्या शंकांचे निरसन यावेळी करण्यात आले.

सर्वेक्षणाचे काम सुरू
‘पीएमआरडीए’कडून विकसित करण्यात येणाऱ्या रस्त्यांमध्ये किती मालमत्ता बाधित होणार आहेत, त्यांचे स्वरूप काय आहे, याची माहिती घेण्यासाठी गेल्या काही दिवसांपासून ‘पीएमआरडीए’च्या वतीने हिंजवडीतील संबंधित रस्त्यांचे सर्वेक्षण करण्यात येत आहे. यात रस्ता किती होणार याची माहिती स्थानिकांना मिळण्यासोबतच त्यांच्या अडचणीही समजून घेतल्या जात आहेत. त्यांना मोबदला कसा मिळणार ? त्याचे स्वरूप काय आहे याचीही माहिती बाधित मालमत्ताधारकांना दिली जात असल्याचे प्रशासनाने सांगितले.

शेतकऱ्यांना ‘टीडीआर’
हिंजवडी, माण, मारुंजी भागातील प्रस्तावित रस्त्यांच्या भूसंपादन प्रक्रियेदरम्यान बाधित शेतकऱ्यांना ‘टीडीआर’ देणार असल्याचे आवाहन म्हसे यांनी पत्राद्वारे केले आहे. यामध्ये पांडवनगर ते माण गावठाण ते फेस ३ (टी जंक्शन), लक्ष्मी चौक ते पद्मभूषण चौक ते विप्रो सर्कल, मेझानाइन ते लक्ष्मी चौक, लक्ष्मी चौक ते मारुंजी, शिंदे वस्ती ते जगताप चौक, मधुबन हॉटेल ते छत्रपती शिवाजी चौक या प्रस्तावित रस्त्यांचा यात समावेश आहे.