‘भटक्या श्वानांचा बंदोबस्त करा’

चिंचवड, ता. ७ : चिंचवडगाव परिसरातील भटक्या श्वानांच्या वाढत्या समस्येकडे लक्ष वेधण्यासाठी महाराष्ट्र नवनिर्माण सेनेच्या शिष्टमंडळाने महापालिकेचे पशुवैद्यकीय अधिकारी अरुण दगडे यांना प्रतिकात्मक श्वान भेट देत अनोख्या पद्धतीने निषेध नोंदवला.
यावेळी मनविसे प्रदेश उपाध्यक्ष हेमंत डांगे, पिंपरी चिंचवड शहराध्यक्ष अनिकेत प्रभू, तुषार वराडे, शंतनू तेलंग, यश कुदळे आदी पदाधिकारी उपस्थित होते. केशवनगर, तालेरानगर, काकडे पार्क, चिंचवड गावठाण भागांमध्ये भटक्या श्वानांचा मुक्त वावर लहान मुले, दुचाकीस्वार, पादचारी, महिला व ज्येष्ठ नागरिकांसाठी अत्यंत त्रासदायक ठरत आहे. श्वानांची नसबंदी वेळेवर न करणे, रेबीज प्रतिबंधक लस तसेच बुस्टर डोस न देणे हे या समस्येचे मुख्य कारण असल्याचे शिष्टमंडळाने दिलेल्या निवेदनात म्हटले आहे.