लोन देण्याच्या नावाखाली फसवणूक

पिंपरी : लोन मिळवून देण्याच्या नावाखाली एका व्यक्तीची दोन लाख ८१ हजार ५०० रुपयांची फसवणूक करण्यात आली. ही घटना चऱ्होली बुद्रूक येथे घडली. याप्रकरणी भरत पाडुरंग काळे (रा. विकासवाडी, धानोरे, ता. खेड) यांनी दिघी पोलिस ठाण्यात फिर्याद दिली आहे. त्यानुसार पोलिसांनी बाळासाहेब हंगारगे (रा. चऱ्होली बुद्रूक, ता. हवेली) याच्यावर गुन्हा दाखल केला आहे. आरोपीच्या सांगण्यावर विश्वास ठेवून फिर्यादीने त्याला रोख आणि गुगल-पेद्वारे एकूण दोन लाख ८१ हजार ५०० रुपये लोन करण्यासाठी दिले. त्यानंतर आरोपीने पैसे परत न करता आणि लोन पास न करता फिर्यादीचा विश्वासघात केला आणि त्यांची आर्थिक फसवणूक केली. तसेच, आरोपीने फिर्यादीला अट्रोसिटीच्या केसमध्ये अडकवण्याची आणि मारून टाकण्याची धमकी दिली.

कोयता बाळगल्याप्रकरणी एकाला अटक
पिंपरी : बेकायदारित्या कोयता बाळगल्याप्रकरणी एका तरुणाला गुन्हे शाखा युनिट दोनच्या पथकाने अटक केली. ही कारवाई निगडी, ओटास्कीममधील श्रमिकनगर येथे करण्यात आली. अरमान बंदेनवाज पठाण (वय १९, रा. ओटास्कीम, निगडी) असे अटक केलेल्या आरोपीचे नाव आहे. आरोपीने कोणत्याही परवान्याशिवाय बेकायदारित्या एक कोयता जवळ बाळगला. याबाबत माहिती मिळाली असता गुन्हे शाखेच्या पथकाने त्याला अटक केली.

पिस्तूल बाळगल्याप्रकरणी एकाला अटक
पिंपरी : बेकायदारित्या पिस्तूल व जिवंत काडतुसे बाळगल्याप्रकरणी एका तरुणाला गुन्हे शाखेच्या मालमत्ता विरोधी पथकाने अटक केली. ही कारवाई भोसरी येथे करण्यात आली. अक्षय संजय गुंड (वय २८, रा. लांडेवाडी, भोसरी) असे अटक केलेल्या आरोपीचे नाव आहे. राजमाता जिजाऊ कॉलेजच्या मागील मैदानाजवळ एक तरुण पिस्तूल घेऊन आल्याची माहिती पथकाला मिळाली. त्यानुसार पथकाने सापळा रचून त्याला अटक केली. त्याच्याकडून ५१ हजार रुपये किमतीचे एक पिस्तूल आणि एक जिवंत काडतूस जप्त केले. भोसरी पोलिस अधिक तपास करीत आहेत.

तडीपार गुंडाला कोयत्यासह अटक
पिंपरी : शहरातून दोन वर्षासाठी तडीपार केले असतानाही शहरात आलेल्या एका गुंडाला अटक करण्यात आली. त्याच्याकडून एक कोयता जप्त केला आहे. ही कारवाई चऱ्होली येथे करण्यात आली. श्रीधर केशव कदम (वय ३०, रा. खंडोबाचीवाडी, धानोरे, ता. खेड) असे अटक केलेल्या आरोपीचे नाव आहे. आरोपी श्रीधर याला पिंपरी चिंचवड पोलिसांनी १८ नोव्हेंबर २०२४ रोजी पुणे जिल्ह्यातून दोन वर्षांसाठी तडीपार केले आहे. तरीही आरोपी कोणतीही परवानगी न घेता आळंदी पोलिस ठाण्याच्या हद्दीत आला. तसेच, आरोपीने बेकायदारित्या एक कोयता जवळ बाळगला.
---